ახალი პარტიის, „ევროპელი სოციალისტების“ სადამფუძნებლო ყრილობაზე პარტიის თავმჯდომარედ, დელეგატების მხარდაჭერით, ფრიდონ ინჯია დაამტკიცეს. ანალოგიურად კენჭისყრით დაფუძნდა პოლიტიკური საბჭო და ასევე, დამტკიცდნენ პარტიის სარევიზიო კომისიის წევრები.
პარტიის პოლიტსაბჭო ცხრა კაცისგან შედგება. ესენი არიან – ფრიდონ ინჯია, ავთანდილ ენუქიძე, დავით ზილფიმიანი, გელა მიქაძე, თამარ კიკნაძე, გიორგი მაღლაკელიძე, ბუხუტი ჭაჭუა, ვიქტორ ცაავა, ირაკლი უბილავა.
სადამფუძნებლო ყრილობაზე მიიღეს პარტიის წესდებაც, რომელიც მხარდამჭერებს ფრიდონ ინჯიამ გააცნო.
„საინიციატავო ჯგუფმა დიდი შრომა ჩადო, რომ ეს ყველაფერი მომზადებულიყო მოკლე დროში. ეს კი იმის მაჩვენებელია, რომ ჩვენს გუნდს შეუძლია, ექსტრემალურ პირობებში ნაყოფიერად იმუშაოს იმისათვის, რომ ქვეყანა გამოვიყვანოთ არსებული კრიზისიდან. აქ წარმოდგენილი პარტიის ბირთვი ის ხალხი, ის პიროვნებებია, რომლებმაც მართლა იციან შრომის ფასი, შებრძოლებიან უსამართლობას და გაუმარჯვიათ.
პარტიის მიზნები და ამოცანები პირველ რიგში იქნება ქვეყნის ინტერესების დაცვა, ქვეყნის ტერიტორიული მთლიანობის აღდგენა, დემოკრატიული ინსტიტუტების მშენებლობა და დაცვა. ინსტიტუციური მძლავრი სამოქალაქო ფორმირების ხელშეწყობა, ქვეყნის სოციალური და ეკონომიკური პრობლემების გადაჭრა, საქართველოს მრავალვექტორული ევროატლანტიკური ორიენტაციის დაჭერა და მეზობელ სახელმწიფოებთან პარტნიორობაზე დაფუძნებული კეთილმეზობლური ურთიერთობის დამყარება; თავისუფალი და სამართლიანი არჩევნების ჩატარების ხელშეწყობა; ქვეყნის გამთლიანება, კეთილდღეობა, ევროპული, სამართლებრივი და ამავდროულად ქართული სახელმწიფოს შექმნა; წესრიგი ყველგან, როგორც შიგნით, პარტიაში, ისე იქ, სადაც ხელი მიგვიწვდება.
ვიქნებით კრიტიკული სასამართლო ხელისუფლების მიმართ, რომელზეც ბევრი რამ არის დამოკიდებული, განსაკუთრებით, ინვესტიციები. სასამართლო კი ამ კრიტერიუმებიდან ძალიან შორს არის.
ჩვენი პარტია მიმზიდველი უნდა გახდეს ჩვენი იდეოლოგიით, ქვეყნის სიყვარულით, წესრიგით, კონკრეტულობით და რეალური ამოცანებით, გუნდურობით, მოსახლეობის სოციალური მდგომარეობის გაუმჯობესების სიამოვნებით. ჩვენ უნდა ავიკაპიწოთ ხელი, ზოგ შემთხვევაში თავიდან უნდა ვისწავლოთ საქმე.
ჩვენ ვართ ტრადიციული ქვეყანა, რომელიც გვჯერა, რომ ღმერთის ნაჩუქარია, რომელიც ხელგაწვდილი არ უნდა იყოს, ჩვენ უნდა გადავაქციოთ ისეთი ქვეყანა, როგორიც მრავალი საუკუნის განმავლობაში იყო.” -განაცხადა ფრიდონ ინჯიამ პარტიის წესდების წარდგენის დროს.
კომენტარები