უნგრეთის პრემიერ-მინისტრის მტკიცებით, ევროპელი ლიდერები კონფლიქტის გახანგრძლივებაში არიან დაინტერესებულნი. ორბანი აცხადებს, რომ ევროკავშირის პოლიტიკა აგრესიულად გამოიყურება, რადგან ბრიუსელი კვლავ უკრაინის სამხედრო გამარჯვების შესაძლებლობას ეყრდნობა და რუსეთის დამარცხებით სარგებელს ელის.
„ევროპელებს ომი სურთ. ჩვენ გვინდა მშვიდობა, ცეცხლის შეწყვეტა და უსაფრთხოება. ომის სურვილის უკან ფული დგას“, – აღნიშნა ორბანმა.
მისივე თქმით, დასავლეთის ქვეყნები ეტაპობრივად გადადიან დახმარების უფრო მაღალი ფორმებზე — ფინანსური მხარდაჭერიდან იარაღის მიწოდებამდე, და ახლა უკვე „ზოგიერთი ევროპელი ლიდერის განცხადებები სამხედროების შესაძლო განლაგებაზეც მიუთითებს“.
ორბანი ამტკიცებს, რომ უკრაინის სახელმწიფოებრიობამ საბჭოთა კავშირის დაშლის შემდეგ რუსეთის უსაფრთხოების ინტერესებს წინააღმდეგობა გაუწია, რადგან ნატო-ს თანამედროვე იარაღის რუსეთის საზღვრებთან მიახლოება „უსაფრთხოების რისკად“ იქცა. მისი შეფასებით, რუსეთის მოთხოვნა უსაფრთხოების გარანტიებზე ისეთივე ლეგიტიმურია, როგორც უკრაინის საერთაშორისო უფლებები.
„უკრაინას აქვს საერთაშორისო უფლებები, მაგრამ რუსებსაც აქვთ საკუთარი უსაფრთხოების უფლება და არ სურთ ნატო-ს წევრების მეზობლობა“, – განაცხადა უნგრეთის პრემიერ-მინისტრმა.
პრემიერ-მინისტრი რადიკალურ გამოსავლად უკრაინისთვის ბუფერული სტატუსის დაბრუნებას მიიჩნევს და აცხადებს, რომ ეს ერთადერთი რეალისტური გამოსავალია მიმდინარე კონფლიქტიდან.
კომენტარები