ევროკავშირის საბჭო – აგრესიულ ომზე სრული პასუხისმგებლობა რუსეთსა და მის თანამზრახველ ბელარუსს ეკისრებათ

10 მარტს საფრანგეთში, ვერსალში ევროკავშირის საბჭოს არაფორმალური შეხვედრა გაიმართა.

შეხვედრის პირველი დღის ბოლოს ლიდერებმა ერთობლივი განცხადება გაავრცელეს. ევროპელი ლიდერები უკრაინის წინააღმდეგ რუსეთის აგრესიას „არაპროვოცირებულს და გაუმართლებელს“ უწოდებენ და ასევე აკისრებენ სრულ პასუხისმგებლობას რუსეთსა და ბელარუსს.

„ორი კვირის წინ რუსეთმა ევროპაში ომი დააბრუნა. რუსეთის არაპროვოცირებული და გაუმართლებელი სამხედრო აგრესია უკრაინის წინააღმდეგ უხეშად არღვევს საერთაშორისო სამართლისა და გაეროს წესდების პრინციპებს, ძირს უთხრის ევროპულ და გლობალურ უსაფრთხოებასა და სტაბილურობას. რუსეთსა და მის თანამზრახველ ბელარუსს ეკისრებათ სრულ პასუხისმგებლობა ამ აგრესიულ ომზე და პასუხისმგებელი პირები პასუხს აგებენ თავიანთ დანაშაულზე, მათ შორის თავდასხმებზე მშვიდობიან მოსახლეობასა და სამოქალაქო ობიექტებზე“, – ნათქვამია განცხადებაში.

დოკუმენტის ავტორები მიესალმებიან სისხლის სამართლის საერთაშორისო სასამართლოს პროკურორის გადაწყვეტილებას გამოძიების დაწყების შესახებ და მოუწოდებენ რუსეთის ფედერაციას, დაუყოვნებლივ შეწყვიტოს საომარი მოქმედებები, გაიყვანოს მთელი თავისი ჯარი, უზრუნველყოს უკრაინის ბირთვული ობიექტების უსაფრთხოება, პატივი სცეს მის ტერიტორიულ მთლიანობას, სუვერენიტეტსა და დამოუკიდებლობას საერთაშორისოდ აღიარებულ საზღვრებში.