ესპანეთის პრემიერ-მინისტრმა, პედრო სანჩესმა პირობა დადო, რომ ქვეყანაში პროსტიტუცია უკანონო გახდება. ამის შესახებ BBC წერს.
გამოცემის ინფორმაციით, შესაბამისი განცხადება სანჩესმა სოციალისტური პარტიის კონგრესზე გააკეთა. მან აღნიშნა, რომ პროსტიტუცია ქალებს ამონებს. ამ გეგმის შესახებ სანჩესი ჯერ კიდევ 2019 წელს, თავის საარჩევნო მანიფესტში წერდა, სადაც აღნიშნული იყო, რომ პროსტიტუცია „სიღარიბის ფემინიზაციის ერთ-ერთი უსასტიკესი ასპექტი და ქალთა წინააღმდეგ ძალადობის ერთ-ერთი ყველაზე ცუდი ფორმაა“. თუმცა დღემდე ამ მიმართულებით კონკრეტული ნაბიჯები არ გადადგმულა.
ესპანეთში პროსტიტუციის დეკრიმინალიზაცია 1995 წელს მოხდა. 2016 წელს, გაეროს კვლევის მონაცემებით, ამ ინდუსტრიის ღირებულება ქვეყანაში 3,7 მილიარდ ევროს შეადგენდა. ამ სფეროში დაახლოებით 300 ათასი ქალია დასაქმებული. არსებული სისტემის მომხრეები მიიჩნევენ, რომ პროსტიტუციის დეკრიმინალიზაციის შემდეგ ინდუსტრიაში დასაქმებული ქალების ცხოვრება უფრო უსაფრთხო გახადა. მოწინააღმდეგეები კი აღნიშნავენ, რომ დეკრიმინალიზაციამ ტრეფიკინგის პოტენციალი გაზარდა.
კომენტარები