ლევან ჯავახიშვილი
„ალიას“ ესაუბრება „ლეიბორისტული პარტიის“ გენერალური მდივანი, გიორგი გუგავა.
– აზერბაიჯანის პრეზიდენტი, ილხამ ალიევი იყო თბილისში ვიზიტით და პრეზიდენტი, სალომე ზურაბიშვილი „მოტეხეს“. არც ზურაბიშვილის მომხრე ვარ, არც ხმა მიმიცია მისთვის არც ერთ ტურში, მაგრამ ასეთი შეურაცხყოფა უნდა მიაყენო პრეზიდენტს და პრეზიდენტის ინსტიტუტს?
– კონსტიტუციით პრეზიდენტი საგარეო ურთიერთობებში არის ქვეყნის უმაღლესი წარმომადგენელი და მთავარსარდალი. მოგწონს, არ მოგწონს, ფაქტობრივად, ასეა. უპრეცენდენტო შემთხვევა იყო, უცხო ქვეყნის პრეზიდენტის ვიზიტი იგეგმებოდა და პრეზიდენტი საქმის კურსშიც არ ჩააყენეს. ეს წარმოუდგენელია, კონსტიტუციის დარღვევაა, რაც დასჯადი ქმედებაა. მერე, ილხამ ალიევი რომელიმე სახელმწიფო უწყებაში კი არ მიიღეს, მცხეთაში, კერძო რესტორან „შატო მუხრანში“ შეხვდა მას ირაკლი ღარიბაშვილი ოფიციალურად და მერე, არაოფიციალურად, ფარულად ბიძინა ივანიშვილი. ამის გამო გადაწყვიტეს რესტორანში შეხვედრა. აღმოჩნდა, რომ ეს რესტორანი ეკუთვნის პუტინთან და მის გარემოცვასთან დაახლოებულ შვედ ბიზნესმენს, რომელიც პუტინმა „ღირსების ორდენით“ დააჯილდოვა და ბევრ რუსულ პროექტში აქვს მიღებული მონაწილეობა. ამ საიდუმლო შეხვედრაზე დაალაგეს ყველაფერი, რაც აინტერესებდათ. გაიყიდა დავით გარეჯი, რაც ისტორიული ღალატია და მოვა დრო და ამაზე აუცილებლად მოეთხოვებათ პასუხი. რუსეთ-უკრაინის ომის გამო, გაიზარდება ნავთობპროდუქტებისა და გაზის გადაზიდვა. მათ შორის, დაიტვირთება ბაქო-თბილისი-ჯეიჰანის მილსადენი და ბაქო-სუფსის მილსადენი, თავისთავად სუფსის ტერმინალიც. გარდა მაგისა, აზერბაიჯანიდან გაიზრდება ელექტროენერგიის იმპორტი და აქაც გამტარი საქართველო უნდა იყოს. მოგეხსენებათ. ამ საკითხებს არეგულირებდა ივანიშვილის დეიდაშვილი, უჩა მამაცაშვილი, რომელიც უკრაინის ხელისუფლებამ დაასანქცირა და მალე ევროკავშირი და ამერიკაც დაასანქცირებენ. მამაცაშვილს ამ სანქციების გამო ჩაანაცვლებენ სხვა პიროვნებით თუ არა, ესეც გასარკვევი აქვთ. ნაღდია, ერთ კაცს არ გადააყოლებენ მრავალმილიარდიან გეგმებს, რომელთა განხორციელებასაც ალიევი და ივანიშვილი აპირებენ. ეს საკითხები განიხილეს, უფრო მეტი ფული როგორ იშოვნონ, მაგაზე იყო ლაპარაკი. ამის გაგრძელება იყო ირაკლი ღარიბაშვილის ვიზიტი უნგრეთში, სადაც შეხვდა პუტინის ერთადერთ მოკავშირეს ევროკავშირში, პრემიერ-მინისტრ ვიქტორ ორბანს და ზუსტად აზერბაიჯანიდან საქართველოს გავლით, უნგრეთისთვის ელექტროენერგიის მიწოდება იყო მათი შეხვედრის მთავარი თემა.
– „შატო მუხრანის“ საიდუმლო შეხვედრისას, დავით გარეჯის შესაძლო გაყიდვაზე ბევრი ლაპარაკობს, მაგრამ კონკრეტული მტკიცებულებები არსებობს?
– მეტი რაღა მტკიცებულება გვინდა? აზერბაიჯანის პრეზიდენტი იყო ჩამოსული და ამ სადავო საკითხზე სიტყვა არ დაუსველებიათ. ჩიჩხიტურისა და აღდგომის მონასტრები აზერბაიჯანელებს უკავიათ, მათი სასაზღვრო ჯარი დგას და ქართველებს არ უშვებენ ამ მონასტრებში სალოცავად. არც მღვდელმსახურებს და არც ხალხს. ხომ გაჰყვიროდნენ, რუკები გვაქვს ჩამოტანილი, რომელთა მეშვეობითაც დავამტკიცებთ, რომ ორივე მონასტერი ჩვენს ტერიტორიაზეა, ორივე საქართველოს უნდა გადმოეცეს და ჩვენთან აზერბაიჯანს სადავო გოჯი მიწა აღარაფერი ექნებაო. სად წაიღეს ის რუკები? რატომ აღარ აჩენენ? რატომ არ მუშაობს დელიმიტაციისა და დემარკაციის კომისია? რატომ აღარ იღებენ ხმას ხელისუფლების წარმომადგენლები დავით გარეჯზე და რატომ აღარ ამბობენ, რომ ეს სამონასტრო კომპლექსი საქართველოსია? ეს ყველაფერი რაზე მეტყველებს? გაიყიდა დავით გარეჯი, ჩემო კარგო, გაიყიდა ნავთობ-წილებში.
კომენტარები