,, ეს პირდაპირ მიუთითებს იმაზე რომ გინდათ ცოფის გავრცელება მთელ ქვეყანაში” – ტასო ლოსაბერიძე სეს-ს

ცხოველთა დამცველი, ტასო ლოსაბერიძე სეს-ს მიმართავს:

,,გუშინ სურსათის სააგენტომ კიდევ ერთი ცოფის შესახებ გვაცნობა, ამჯერად ძაღლზე, რომელსაც თურმე 2 ადამიანი დაუკბენია და შემდეგ ცოფით მოკვდა.

ჩემთვის პირადად ძალიან საეჭვოა ეს ყველაფერი, ძაღლების გაქრობის პარალელურად ცოფის ამდენი შემთხვევა რომ
ფიქსირდება და როცა ასე ავრცელებენ ამ ამბავს.
მაგალითად შარშან 10 ზე მეტი შემთხვევა დაფიქსირდა ცოფის ძაღლში, მაგრამ მაქსიმალურად მალავდნენ ხოლმე.
ახლა რატომ იყენებენ ასე სიხარულით ძალიან საეჭვოა.

ვთქვათ დავიჯერეთ რომ ბოლო 1 კვირაში ცოფის შემთხვევები დაფიქსირდა – სესი ოფიციალურ განცხადებაში გვეუბნება რომ გამოცხადდა კარანტინი.

აქვე გავნმარტავ რას ნიშნავს კარანტინის გამოცხადება:

კარანტინი ასეთ შემთხვევაში ნიშნავს, რომ თავშესაფარი დროებით იზოლაციაში გადადის, რათა არ გავრცელდეს ცოფი.
რას მოიცავს ეს პრაქტიკაში:

1. გადაადგილების სრული შეზღუდვა
• თავშესაფრიდან ცხოველების გაყვანა იკრძალება
• ახალი ცხოველების მიღებაც წყდება
• თანამშრომლები მკაცრად კონტროლდება ძაღლებთან კონტაქტის დროს

2. ინფიცირებულის იზოლაცია
• ეჭვმიტანილი ან დადასტურებული ცხოველი ცალკე, მკაცრ იზოლაციაში გადადის
• მასთან კონტაქტი მხოლოდ სპეციალურ დამცავ აღჭურვილობითაა დაშვებული

3. ცხოველების მიღება
• ცხოველების მიღება სრულად ჩერდება, მათ შორის სტერილიზაციაზეც
• მუშაობენ მხოლოდ უკვე მყოფ ცხოველებზე (მოვლა, დაკვირვება, ვაქცინაცია)
• გამონაკლისი შეიძლება იყოს მხოლოდ:
• მძიმე ტრავმირებული ცხოველი (გადაუდებელი დახმარება)
• და ისიც — მკაცრი იზოლაციის პირობებში.

ამ დროს რა ხდება? გვითხრეს რომ მარტვილში დაჭერილ ძაღლს ქუთაისის თავშესაფარში დაუფიქსირდა ცოფი, თუმცა დღეს სხვადასხვა ქალაქებში ისევ დაიჭირეს ძაღლები და წაიყვანეს პოპულაციის მართვის მოტივით.

თუ კარანტინი გამოცხადდა და ცოფის კერიდან წაიყვანეს ძაღლები, არანაირი უფლება აღარ აქვთ სხვა ქალაქებიდან შეიყვანონ ჯანმრთელი ცხოველები, რადგან ეს პირადპირ ცოფის გავრცელების უდიდესი რისკია.

ასევე, დღეს სურსათს ვკითხეთ ცოფის კერიდან წაყვანილი ძაღლების ბედი, უნდა დაეხოცათ თუ აპირებდნენ ძაღლებზე დაკვირვებას.
პასუხად მივიღეთ რომ ძაღლებს აკვირდებიან 10 დღის განმავლობაში, შემდეგ რას უზამენ, არ ვიცით. ოღონდ ის არავითარ შემთხვევაში არ უნდა დაგვავიწყდეს რომ ათეულობით ძაღლს აკვირდებიან ცოფზე და პარალელურად ჯანმრთელი ძაღლები სტერილიზაციაზე მიყავთ.

მე მართლა არ ვიცი 10 დღე რაზე აკვირდებიან, ცოფის დაკვირვების ვადები:

ის ძაღლები, რომლებიც კონტაქტში იყვნენ ინფიცირებულთან, მაგრამ უკვე ვაქცინირებულები არიან ცოფზე, დაკვირვების ვადა, ყველაზე ხშირად: 45 დღე (დაახლოებით 1.5 თვე), ზოგ ქვეყანაში/პროტოკოლში: 30–90 დღე.

ხოლო აუცრელი ძაღლების შემთხვევაში ხდება გრძელი, მკაცრი კარანტინი 3–6 თვე.

სესმა გაასაჯაროვოს ინფორმაცია – რამდენი ძაღლი წაიყვანეს ცოფის კერიდან, რა ბედი ეწევათ ამ ძაღლებს, უნდა დახოცონ და დაარღვიონ კანონი თუ ჩასვან 6 თვიან კარანტინში და მოიქცენ კანონის შესაბამისად, ანუ შეაჩერონ ჯანმრთელი ძაღლების შედინება.

სურსათის ეროვნული სააგენტო, გვითხარით, თუ ცოფი ნამდვილად დაფიქსირდა, რატომ არ აჩერებთ ყველანაირ პროგრამას რომელიც ჯანმრთელი ძაღლების გადაყვანას მოიცავს?

ეს პირდაპირ მიუთითებს იმაზე რომ გინდათ ცოფის გავრცელება მთელ ქვეყანაში, რაც ადამიანების სიცოცხლესაც საფრთხეში ჩააგდებს, თუკი ცოფი ნამდვილად დაფიქსირებულია.