სახალხო დამცველი, ლევან იოსელიანი „ხელოვნურადაა ატეხილ აჟიოტაჟს“ უწოდებს კრიტიკას, რომელიც ძალადობის მსხვერპლთა თავშესაფრის შესახებ მის განცხადების მოჰყვა.
ადამიანის უფლებებზე მომუშავე ადამიანები, მათ შორის ომბუდსმენის აპარატის ყოფილი თანამშრომლები ლევან იოსელიანს თავშესაფრის მისამართის გასაჯაროების გამო აკრიტიკებენ. იოსელიანმა თავშესაფარზე საზოგადოებრივ მაუწყებელან ინტერვიუში 24 იანვარს ისაუბრა. იოსელიანის განცხადების კრიტიკასთან ერთად, უფლებადამცველები საზოგადოებრივ მაუწყებელს ინტერვიუს წაშლისკენ მოუწოდებდნენ. ინტერვიუს ეთერში გასვლიდან მეორე დღეს, 25 იანვარს, არხმა ის წაშალა.
თუმცა თავად იოსელიანი მიიჩნევს, რომ მისი განცხადება ინტერპრეტაციით გავრცელდა.
„თავშესაფრებზე რომ დაიწყეს საუბარი, კარგია, რადგან დიდი ხანია, ამაზე ვსაუბრობ. არავინ ამახვილებდა ყურადღებას იმ პრობლემებზე, რომლებიც თავშესაფრებშია.
თითქოს ვიღაცის პერსონალური ინფორმაცია გავავრცელე, ასეთ რამეს ადგილი არ ჰქონია. დანარჩენი ინტერპრეტაციის საკითხია. ყველას ინტერპრეტაციას პასუხს ვერ გავცემ. არანაირი ადგილმდებარეობა ჩემ მიერ გავრცელებული არ ყოფილა. ეს აჟიოტაჟი აბსოლუტურად ხელოვნურადაა ატეხილი“, – განაცხადა იოსელიანმა საქართველოს პირველ არხთან საუბარში.
კომენტარები