„ეს ადამიანი არც არავის არ მოუწამლავს, არც კვდებოდა და არაფერი არ ხდებოდა… ეს იყო ჩვეულებრივი, მარტივი სპექტაკლი“ – ღარიბაშვილი

სააკაშვილი არასდროს წასულა ქართული პოლიტიკიდან, მიუხედავად მისი სამარცხვინო განცხადებებისა და გამოსვლებისა, – ამის შესახებ საქართველოს პრემიერ-მინისტრმა, ირაკლი ღარიბაშვილმა ჟურნალისტებს განუცხადა.

მისივე თქმით, ყველამ ბოდიში უნდა მოუხადოს ქართულ სახელმწიფოს და საზოგადოებას, ვინც ქვეყნის დამაზიანებელ განცხადებებს აკეთებდნენ.

“სააკაშვილი ქართული პოლიტიკიდან არასდროს არ წასულა, მიუხედავად მისი სამარცხვინო განცხადებებისა და გამოსვლებისა. შეგახსენებთ, რომ იგი სასამართლო პროცესზე წარსდგა, როგორც უკრაინის მოქალაქე და მოითხოვა უკრაინული ენის თარჯიმანი, რათა მას უკრაინულ ენაზე ესაუბრა.

ამაზე მეტი დეგრადაცია და დაცემა, ქართველი პოლიტიკოსის და მით უმეტეს, ქვეყნის ყოფილი პრეზიდენტის, მე მგონია მსოფლიო ისტორიას არ უნახავს. სააკაშვილმა რაც ჩაიდინა ბოლო პერიოდში, მას შემდეგ რაც იგი ციხეში შევიდა, მთელი ეს შოუ, მასკარადი, თეატრი და ცირკი, რაც დაგვიდგა და ის აღვირახსნილი ქვეყნის იმიჯის დამაზიანებელი კამპანია, რაც მან აწარმოა, მისმა ოჯახმა და ლობისტებმა, ამისთვის მათ ყოველდღე უნდა მოუხადონ ბოდიში ჩვენს სახელმწიფოს და ჩვენს საზოგადოებას.

ხომ ვნახეთ ყველამ, რომ ეს ადამიანი არც არავის არ მოუწამლავს, არც კვდებოდა და არაფერი არ ხდებოდა. ეს იყო ჩვეულებრივი, მარტივი სპექტაკლი. ჩვენ ამას ვუხსნიდით საზოგადოებას, არა მხოლოდ ქვეყნის შიგნით, არამედ ქვეყნის გარეთაც, რომ ეს იყო თამაში და სპეკულაციები. ამდენი ხნის შემდეგ, რაც მან საბოლოოდ მიიღო უარი სტრასბურგის სასამართლოდან, რომ შეწყვიტოს ეს თამაში, სპეკულაციები და სიმულაციები, ამის შემდეგ გადაწყვიტა, რომ არის კარგად. საზოგადოების არც ერთ წევრს ქვეყანაში თუ ქვეყნის გარეთ კითხვები აღარ რჩება.

სააკაშვილის თემაზე მე საუბარი არ მინდოდა, მაგრამ ვინაიდან მკითხეთ, მე ერთი პასუხი მინდა ვთქვა: მისმა ლობისტებმა და მათ შორის, ევროპელმა პოლიტიკოსებმა, ამერიკის ზოგიერთმა წარმომადგენელმა, რომელიც ქართული იყვნენ, რომლებიც იცავდნენ ამ სპექტაკლს, ბოდიში უნდა მოუხადონ საზოგადოებას და ჩვენს სახელმწიფოს, იმ ზიანისთვის, რომელიც მათ მიაყენეს მთელს მსოფლიოში. ის აღვირახსნილი კამპანია, რომელიც მიმდინარეობდა სხვადასხვა მედია საშუალებებიდან, რომ ჩვენ მოვწამლეთ, ჩვენ ვაწამებთ, მოვკალით – ამ ყველაფერზე, დიდ ბინძურ კამპანიაზე, ძალიან სამართლიანი და მკაფიო პასუხი გასცა სტრასბურგის სასამართლომ,” – განაცხადა ირაკლი ღარიბაშვილმა.