შექმნილი კრიზისში გამოსავალი მხოლოდ ახალი არჩევნებია, – ამის შესახებ საქართველოს მეხუთე პრეზიდენტმა სოციალურ ქსელში ვიდეომიმართისას ისაუბრა, სადაც მაყურებლების კითხვებს უპასუხა.
სალომე ზურაბიშვილი შეფასებით, “ოცნების” ხელისუფლებას ლეგიტიმაციაც აკლია და კრიზისის გადალახვის უნარიც, რის გამოც ქვეყანაში არსებული პროტესტი და საზოგადოებრივი უკმაყოფილება კიდევ უფრო ღრმავდება.
მისი თქმით, ივანიშვილის ხელისუფლებამ დაკარგა საზოგადოების დარწმუნების შესაძლებლობა, რომ ქვეყანას განვითარების პერსპექტივა აქვს, ხოლო ასეთ ვითარებაში ერთადერთი დემოკრატიული გამოსავალი ახალი არჩევნების ჩატარებაა.
ზურაბიშვილმა ასევე აღნიშნა, რომ ოპოზიცია ერთიან ორგანიზმად არ არსებობს, თუმცა პოლიტიკური პროცესები გარდაქმნის ეტაპზეა და საზოგადოებისთვის ამ ეტაპზე ყველაზე მნიშვნელოვანია არსებული მდგომარეობის მშვიდობიანად გადატანა.
ის ხელისუფლება, რომელიც დღეს მართავს ქვეყანას, არც ლეგიტიმურია და არც აქვს იმის უნარი, რომ ეს კრიზისი გადალახოს. ამ შემთხვევაში, ნებისმიერ ქვეყანაში, პირველი და ერთადერთი საშუალება იმისთვის, რომ გადალახო ეს კრიზისი, რომელიც გამოხატება პროტესტში, მაგრამ არა მხოლოდ, გამოიხატება იმ ყველაფერში, რაც დღეს ვამჩნევთ, რომ ამ რეჟიმს აღარ აქვს საშუალება, რომ თავისი საზოგადოება დაარწმუნოს იმაში, რომ მას აქვს რამე მომავალი და ამ ქვეყანაში ნამდვილად ქმნის რამე პერსპექტივას. გამოსავალი არის ერთი და ერთადერთი – ახალი არჩევნები.
ერთი ასეთი ორგანიზმი, რომელსაც ჰქვია ოპოზიცია – არ არსებობს. არსებობს პოლიტიკური პარტიები, რომლის მიმართ არის შედარებით შემცირებული ნდობა. ახალი პოლიტიკური პარტიები არსებობენ, რომლის მიმართ არ არის ასე შემცირებული და ალბათ, რომ იზომებოდეს, მზარდია მათ მიმართ ნდობა, მაგრამ კიდევ ერთხელ, დღეს მნიშვნელოვანია, რომ საზოგადოებამ მთლიანად გაუძლოს ამ დღევანდელ მდგომარეობას. ის პარტიები, რომლებსაც სჭირდებათ გარდაქმნა, ალბათ გარდაიქმნებიან მომავალში. ის პარტიები, რომლებიც დღეს იქმნებიან, უთუოდ გაიზრდებიან და ჩამოყალიბდებიან, – განაცხადა სალომე ზურაბიშვილმა.
კომენტარები