ადვოკატი ლალი აფციაური სებ-ის ახალ რეგულაციას ეხმაურება:
,,ეროვნული ბანკი შენ თავად ხარ მოწყვლადი სეგმენტი!!!!!
საქართველოს ეროვნული ბანკის მიერ შემოღებული ახალი რეგულაცია, რომელიც 60 წელს გადაცილებულ მოქალაქეებს მხოლოდ მათი ასაკის გამო საკუთარი ფულის განკარგვისას განსაკუთრებულ კონტროლს უწესებს, პრინციპულად მიუღებელია.
ნუ აქცევთ ადამიანის ასაკს მისი გონივრული გადაწყვეტილების მიღების უნარის საზომად.
60 წელს გადაცილებული ადამიანი არ არის არც არასრულწლოვანი, არც შეზღუდულქმედუნარიანი და არც სახელმწიფო მეურვეობის ქვეშ მყოფი პირი.
ამიტომ მიმაჩნია, რომ აღნიშნული რეგულაციის ასაკობრივი კრიტერიუმი საჭიროებს ძალიან მკაცრ სამართლებრივ და კონსტიტუციურ შეფასებას.
ხოდა იმ დრომდე ვიდრე მივმართე სასამართლოს სადაც 60 წლის და გადაცილებული მოსამართლეები ასრულებენ თავის მოვალეობას იქნებ გონს მოხვიდეთ.
მივმართავ საქართველოს ეროვნულ ბანკს, საჯაროდ წარმოადგინოს კონკრეტული კვლევა, სტატისტიკური მონაცემები და სამართლებრივი დასაბუთება, რომლის საფუძველზეც 60 წელს გადაცილებული ყველა მოქალაქე, განურჩევლად მისი განათლების, პროფესიის, გამოცდილებისა და ფინანსური ცოდნისა, ასეთ „მოწყვლად სეგმენტად“ იქნა მიჩნეული.”
ეროვნული ბანკის მიერ გავრცელებულ ინფორმაციაში ნათქვამია:
„განახლებული რეგულაციები ეფუძნება საუკეთესო საერთაშორისო პრაქტიკას და მოიცავს ისეთ დამატებით მოთხოვნებს, რომლის მიხედვით საგადახდო მომსახურების პროვაიდერი ვალდებულია 60 წელს გადაცილებულ მომხმარებელთა ანგარიშებიდან შესასრულებელ გარკვეულ ტრანზაქციებზე რისკების მართვა უფრო მაღალი სტანდარტით განახორციელოს.
ცვლილებების მიხედვით, შესაძლო თაღლითური ქმედების შედეგად ელექტრონული გადახდის ოპერაციის შესრულების პრევენციის მიზნით, საგადახდო მომსახურების პროვაიდერმა, კანონმდებლობით გათვალისწინებული მონიტორინგის მექანიზმებში, დამატებით უნდა დანერგოს დაცვის სპეციალური ზომები 60 წელს გადაცილებული მომხმარებლებისთვის.
კერძოდ, საგადახდო მომსახურების პროვაიდერმა დროებით უნდა შეაჩეროს ან, სადაც ეს შეუძლებელია, უარი თქვას მომხმარებლის მიერ ინიციირებული რისკიანი ელექტრონული გადახდის ოპერაციის შესრულებაზე”
კომენტარები