“ექვსივე ტყვია თავში ესროლა” – ვის ეძებს პოლიცია? – დეტალები

ავჭალაში, ავტომანქანაში ჩაცხრილული ვალერიან ნემსიწვერიძის საქმეზე სავარაუდო დამნაშავეს სამართალდამცავები ამ დრომდე ეძებენ. ოჯახის ადვოკატი ნიკოლოზ წულეისკირი აცხადებს, რომ სავარაუდო დამნაშავე საგამოძიებო ორგანოს შემთხვევის დღესვე ჰყავდა იდენტიფიცირებული.

არსებული ინფორმაციით, რომელსაც ადვოკატიც ადასტურებს, სამართალდამცავები მამაკაცს ეძებენ, რომელიც მკვლელობის ადგილზე მდებარე მაღაზიის მეპატრონეა.

ნიკოლოზ წულეისკირის თქმით, მასზე საგამოძიებო უწყება ოპერატიული ინფორმაციის საფუძველზე გავიდა.

ასევე, არსებული ინფორმაციით, სავარაუდო დამაშავემ საკუთარი ავტომანქანა შემთხვევის ადგილზე დატოვა, თავად კი ფეხით მიიმალა.

მოკლული ვალერიან ნემსიწვერიძის ოჯახის ადვოკატი ამბობს, რომ სამართალდამცავებმა ვასილ ჯანჯღავას საცხოვრებელ სახლში ჩხრეკა ჩაატარეს და მას ამ დრომდე ეძებენ. წულეისკირის თქმითვე, საგამოძიებო უწყებამ 41-მდე ანაბეჭდი, სავარაუდო დამნაშავის დნმ, ასევე სუნის ნიმუშები აიღო.

ადვოკატი ვარაუდობს, რომ მკვლელობა არა წარსულში რაიმე უთანხმოებას, არამედ წამიერ შელაპარაკებას მოჰყვა.

მისივე თქმით, ვალერიან ნესიწვერიძის გარემოცვა სავარაუდო დამნაშავეს არ იცნობს. შესაბამისად, ოჯახისთვის მკვლელობის მოტივი უცნობია.

მოკლულ მამაკაცს 6 ტყვია ესროლეს, მას ექვსივე თავში ჰქონდა მოხვედრილი.

ინტერპრესნიუსი