ბრაზილიაში საბერძნეთის ელჩის მეუღლე ფრანსუაზა დე სოუზა ოლივიერას ხანგრძლივი პატიმრობა შეეფარდა ქმრის, კირიაკოს ამირიდისის მკვლელობის გამო, იუწყება პორტალი G1.
სასამართლომ პატიმრობა მიუსაჯა მის საყვარელს, სამხედრო პოლიციელ სერჟიო გომეშსაც, ელჩის მკვლელობაში გამოტყდა და დამკვეთად მისი მეუღლე დაასახელა.
გამოცემის მიხედვით, სასამართლომ ფრანსუაზა დე სოუზა ოლივიერას 31 წლით, ხოლო მის საყვარელს, პოლიციელ სერჟიო გომეშს 22 წლით პატიმრობა შეუფარდა.
59 წლის კირიაკოს ამირიდისი კონსულად მუშაობდა რიო-დე-ჟანეიროში 2001-2004 წლებში, როდესაც 20 წლით უმცროს ფრანსუაზა დე სოუზა ოლივიერაზე დაქორწინდა. წყვილს ქალიშვილი შეეძინა. შემდეგ ის ქვეყანაში საბერძნეთის ელჩის რანგში დაბრუნდა.
კირიაკოს ამირიდისი 2016 წლის 26 დეკემბერს გაუჩინარდა, ქმრის გაუჩინარების თაობაზე პოლიციას თავად ფრანსუაზა დე სოუზა ოლივიერამ შეატყობინა და განაცხადა, რომ მისი მეუღლე იჯარით აღებული მანქანით წავიდა სადღაც ისე, რომ არაფერი უთქვამს.
პოლიციამ ელჩის ცხედარი მეორე დღეს იპოვა დამწვარი ავტომობილის საბარგულში. გამოძიებით დადგინდა, რომ 59 წლის ამირიდისი სერჟიო გომეშმა ფრანსუაზას დაკვეთით მოკლა ბინაში, სადაც წყვილი იყო გაჩერებული, მერე კი გვამი მანქანის საბარგულში ჩადეს და ცეცხლი წაუკიდეს.
კომენტარები