ეკატერინე ტიკარაძე: ჩვენ ვერ შევაგროვებთ და ვერ გავუკეთებთ მობილიზაციას იმ საწოლების რაოდენობას, რომელიც ფიზიკურად არ გვაქვს, ან ექიმები ვერ მოემსახურებიან

საწოლფონდებთან დაკავშირებით ჩვენ პირველი ტალღიდან მოყოლებული ვამბობთ, რომ ეს რესურსიც არის შეზღუდული. ჩვენ ვერ შევაგროვებთ და ვერ გავუკეთებთ მობილიზაციას იმ საწოლების რაოდენობას, რომელიც ფიზიკურად არ გვაქვს, ან ექიმები ვერ მოემსახურებიან, – ამის შესახებ საქართველოს ჯანდაცვის მინისტრმა, ეკატერინე ტიკარაძემ განაცხადა.

მისი თქმით, ჩატარებული კვლევის მიხედვით, 100 000 მოსახლეზე საქართველოს მიერ მობილიზებული საწოლები სამჯერ მეტია, ვიდრე ეს დასავლეთის ქვეყნებს აქვთ გაკეთებული.

„ჯანდაცვის სამინისტრო ვერ გააკეთებს იმ შეუძლებელს, რაც დღევანდელი არსებული რესურსით საქართველოში შეუძლებელია. გარდა ამისა, ვინაიდან ხშირად გვესმის კრიტიკა იმასთან დაკავშირებით, რომ ან დროულად არ მოვემზადეთ, ან საკმარისად არ მოვემზადეთ, ან საკმარისი საწოლი არ მოვამზადეთ, გავაკეთეთ ანალიზი და შევადარეთ ჩვენი მობილიზებული საწოლების რაოდენობა სხვა ქვეყნებში მობილიზებულ საწოლებს და გამოიკვეთა, რომ 100 000 სულ მოსახლეზე ჩვენ გვაქვს მობილიზებული დაახლოებით სამჯერ მეტი საწოლი, ვიდრე ეს დასავლეთის ქვეყნებს აქვთ გაკეთებული. ამიტომ, ვთვლი, რომ იმ შესაძლებლობების ფარგლებში რაც საქართველოში ჯანდაცვის სამინისტროსა და მის ყველა უწყებას გააჩნია, ჩვენ ვაკეთებთ ჩვენ მაქსიმუმს, თუმცა, რა თქმა უნდა, ეს არ არის საკმარისი და სწორედ ამიტომ მივმართავთ საზოგადოებას და ვითხოვთ დახმარებას და მორჩილებას, რათა ეს ვირუსი გახდეს უფრო მეტად მართვადი და არ იყოს კოლაფსი“, – განაცხადა ეკატერინე ტიკარაძემ.