მეტრო „ისანში“ მომხდარი ფაქტი იყო ძალიან შემაშფოთებელი, დაველოდოთ გამოძიების დასრულებას, – ამის შესახებ თბილისის მერმა კახა კალაძემ განაცხადა.
„მეტროსადგურ „ისანში“ მომხდარი ფაქტი იყო ძალიან შემაშფოთებელი. აღმაშფოთებელია, როდესაც ასეთი ფაქტი სამწუხაროდ, ხდება, მით უმეტეს, არასრულწლოვანზე და შშმ პირზე. მიმდინარეობს გამოძიება და დაველოდოთ მის დასრულებას. ეს არის პოლიციელის მუნდირის შეურაცხყოფა. ზოგადად პოლიციელი ასოცირდება გმირობასთან. ეს არიან ადამიანები, რომლებიც თავიანთი სიცოცხლის ფასად ყველაფერს აკეთებენ, რათა ქვეყანაში იყოს წესრიგი და მშვიდობა. ამასთან, მისასალმებელია შინაგან საქმეთა სამინისტროს მხრიდან მყისიერი რეაგირება“, – განაცხადა კახა კალაძემ.
ცნობისთვის, თბილისში, ისნის მეტროსადგურში პოლიციელი შშმ პირს ფიზიკურად გაუსწორდა. ვიდეო კადრებში ნათლად ჩანს, როგორ აჰყავთ სამართალდამცავებს ახალგაზრდა კაცი ესკალატორზე. შშმ პირის მეგობარი პოლიციელს აფრთხილებს, რომ “ის ყრუ-მუნჯია და ხელი გაუშვას”, რაზეც სამართალდამცველი პასუხობს:
“რომ ავალაპარაკო ახლა?” და აგრძელებს მოქალაქის ცემას. ვიდეოჩანაწერზე აღბეჭდილი ძალადობის ფაქტზე დაკავებულია შინაგან საქმეთა სამინისტროს ორი თანამშრომელი.
კომენტარები