დუმაში შევიდა კანონპროექტი, რომელიც რუსეთის ტერიტორიაზე საგარეო სანქციების აღსრულებისთვის 10 წლამდე თავისუფლების აღკვეთას ითვალისწინებს. ამის შესახებ BBC წერს.
დუმის ვებგვერდის ცნობით, ინიციატივა წარმოადგინა სახელმწიფო მშენებლობისა და კანონმდებლობის კომიტეტის თავმჯდომარემ პაველ კრაშენინიკოვმა “დეპუტატთა და სენატორების ჯგუფთან ერთად”.
პარლამენტარები თავაზობენ შეიცვალოს სისხლის სამართლის კოდექსის მუხლში უფლებამოსილების გადამეტების შესახებ ნაწილი (რუსეთის ფედერაციის სისხლის სამართლის კოდექსის 201-ე მუხლის მე-2 ნაწილი) და დაწესდეს სასჯელი “ჩადენილი ქმედებისთვის, აღასრულოს უცხო სახელმწიფოს გადაწყვეტილება რუსეთის წინააღმდეგ შემაკავებელი ზომების შემოღების შესახებ”.
სასჯელი მოიცავს ჯარიმას 1 მილიონ რუბლამდე, იძულებით შრომას ხუთ წლამდე ან თავისუფლების აღკვეთას 10 წლამდე, ასევე გარკვეული თანამდებობების დაკავების აკრძალვას სამ წლამდე.
“ცხადია, საგარეო სანქციების ერთ-ერთი მიზანია რუსეთის საშინაო ეკონომიკის დესტაბილიზაცია. ქვეყნის შიგნით ეკონომიკური მდგომარეობის გაუარესების თავიდან ასაცილებლად, ჩვენ ვთავაზობთ რუსეთის ფედერაციის სისხლის სამართლის კოდექსში ცვლილებას”, – განაცხადა კრაშენინიკოვმა ინიციატივაზე.
“ერთიანი რუსეთის” გენერალური საბჭოს მდივანმა ანდრეი ტურჩაკმა წამოაყენა წინადადება რუსეთის ტერიტორიაზე სანქციების დაცვისთვის სისხლისსამართლებრივი პასუხისმგებლობის დაწესების შესახებ.
მისი თქმით, ზოგიერთი კომპანია უარს ამბობს სანქციების ქვეშ მოქცეულ ბანკებთან და ბიზნესებთან მუშაობაზე, იმ საბაბით, რომ ისინი შესაძლოა თავადაც შეზღუდვების ქვეშ აღმოჩნდნენ. ეს, ტურჩაკის აზრით, შეიძლება ჩაითვალოს “ეკონომიკური მდგომარეობის გაუარესებაში უშუალო თანამონაწილეობად”.
რუსული კომპანიებისა და ოფიციალური პირების წინააღმდეგ სანქციები 2014 წელს, ყირიმის ანექსიის შემდეგ დაიწყო. უკრაინასთან ომის დაწყების შემდეგ რუსეთმა გაუსწრო ირანს, სირიას და ჩრდილოეთ კორეას მის წინააღმდეგ დაწესებული სანქციების რაოდენობით.
კომენტარები