დონალდ ტრამპმა თავისი ყოფილი მრჩეველი, სტივ ბენონი შეიწყალა

აშშ-ის პრეზიდენტმა, დონალდ ტრამპმა თავისი ყოფილი მრჩეველი სტივ ბენონი შეიწყალა, რომელიც სასჯელს თაღლითობისთვის იხდიდა. ამის შესახებ BBC წერს.

გამოცემის ინფორმაციით, ტრამპმა ეს თავისი შემცვლელის, ჯო ბაიდენის ინაუგურაციამდე რამდენიმე საათით ადრე გააკეთა. თეთრი სახლის მიერ გავრცელებულ განცხადებაში ნათქვამია, რომ ბენონი „კონსერვატიული მოძრაობის მნიშვნელოვანი ლიდერი იყო“, მისთვის ბრალდების წარდგენა კი ბენონის პოლიტიკურ პროექტში ჩართულობას უკავშირდება.

ამასთან, ტრამპმა კიდევ 70-ზე მეტი ადამიანი შეიწყალა, მათ შორის რეპერი Lil Wayne და დეტროიტის ყოფილი მერი კვამე კილპატრიკი.

ბენონი 3 პირთან ერთად 2020 წლის აგვისტოში დააკავეს. პროკურატურის განცხადებით, დაკავებულებმა კამპანია „ჩვენ ვაშენებთ კედელს“ ფარგლებში ათასობით დონორი მოატყუეს, რა დროსაც მოქალაქეებს დაპირდნენ, რომ შემოსული თანხა სრულად მოხმარდებოდა კედლის მშენებლობას.

2016 წელს სტივ ბენონი დონალდ ტრამპის საარჩევნო შტაბში ერთ-ერთ წამყვან თანამდებობას იკავებდა. არჩევნების შემდეგ მან დონალდ ტრამპის ადმინისტრაციაში მთავარი სტრატეგის პოსტი დაიკავა, თუმცა 2017 წელს თეთრი სახლი დატოვა.