დოკუმენტი გვაჩვენონ – სად, ვინ და როდის მიიღო ქართული მიწების გასხვისების გადაწყვეტილება – ვალერი გელბახიანი

„ალიას“ ესაუბრება პარტია „გამარჯვებული საქართველოს“ თანადამფუძნებელი, ადვოკატი, ვალერი გელბახიანი.

– „დავით გარეჯის საქმესთან“ დაკავშირებით საზღვრის დაცვის  დეპარტამენტის ყოფილი უფროსი, ბადრი ბიწაძე დაკითხეს პროკურატურაში. იგეგმება თავდაცვის ყოფილი მინისტრის, ირაკლი ალასანიას და პრეზიდენტ სალომე ზურაბიშვილის დაკითხვაც. პროკუტრატურამ გაასაჯაროვა ფარული ჩანაწერების ნაწილი, რაც ამ საქმეზე აქვს. რა ხდება? მართლა დიდ  დანაშაულთან ხომ არ გვქვს საქმე და ნატალია ილიჩოვა და ივერი მელაშვილი მართლა დამნაშავენი ხომ არ არიან? ბევრს გაუჩნდა ეს კითხვები, ვინც აქამდე ორივე მათგანს უკანონო პატიმრებად და პოლიტიკური პროცესების გადაფარვის გამო დაკავებულად მიიჩნევდა.

– ეგეც საგამოძიებო ტრუკებია, ჩემო კარგო. კომისიას გადაწყვეტილება მიღებული არ აქვს, რატომ არ გვაჩვენებენ გადაწყვეტილებას, თუ მიღებულია? დოკუმენტი გვაჩვენონ, რაღაც ქაღალდებს რომ აფრიალებენ – სად, ვინ და როდის მიიღო ქართული მიწების გასხვისების გადაწყვეტილება. ილიჩოვა და მელაშვილი ადგენდნენ ნახაზებს და ნახაზების შედგენა, არ ნიშნავს ტერიტორიების აზერბაიჯანული მხარისთვის გადაცემას. გადაცემა მაშინ ხდება, როდესაც ჯერ შეთანხმება ხდება ორ სახელმწიფოს შორის, უნდა გაფორმდეს ხელშეკრულება და ამ ხელშეკრულებაში უნდა გაიწეროს, რომელი ტერიტორია რომელ სახელმწიფოს ხვდება, სად გადის საზღვრები. ასეთი დოკუმენტი არ არსებობს. ახლა აპიარებენ ფასადურ რეკლამებს, ვითომ, აი, მტკიცებულება გვაქვსო. რისი მტკიცებულება აქვთ? გვანახონ აქტი, რომლის საფუძველზეც  ქართული მიწები აზერბაიჯანს გადაეცა და ამაში ილიჩოვა და მელაშვილი მონაწილეობდნენ. ის ჩანაწერებიც სასაცილოა, მეტი არაფერი. ეგ არაფერი მტკიცებულებები არ არის.

– სტრასბურგში რუსეთს 2008 წლის ომთან დაკავშირებული სასამართლო დავა მოუგო. სტრასბურგის სასამართლომ, ქართული მხარის 8 მოთხოვნიდან 6 დააკმაყოფილა. მათ შორის, რუსეთი დაადანაშაულა ქართველთა გენოციდსა და ეთნოწმენდაში.

– ეს საქართველოს გამარჯვებაა და არა რომელიმე ხელისუფლებისა. წინა ხელისუფლებამ შეიტანა ეს სარჩელი და ამ ხელისუფლებამ ბოლომდე მიიყვანა საქმე. სამწუხაროა, რომ ძირითადი საკითხები არ განიხილა სტრასბურგმა. მაგალითად, რომელმა მხარემ დაიწყო ომი და ის 5 დღე, როდესაც სისხლის გუბეები დააყენეს ცხინვალში და მის მიმდებარე ქართულ სოფლებში. 8–12 აგვისტოს დატრიალებული მრავალი  ტრაგედია და საშინელება არ შეფასდა. სასამართლოს ამ გადაწყვეტილებას შედეგები უნდა მოჰყვეს, კომპენსაცია უნდა მისცეს საქართველოს  დაზარალებულ მოქალაქეებს რუსეთმა. აღსრულება გაჭირდება, თუმცა, პოლიტიკურად, იურიდიულად და იდეოლოგიურად ეს დიდი გამარჯვებაა.

ლევან ჯავახიშვილი, ალია