დღეს „ქართული ოცნების“ ლიდერები ეუთო/ოდირის სადამკვირვებლო მისიის წარმომადგენლებს შეხვდებიან

,,ქართული ოცნების“ ლიდერებისა და ,,ეუთო/ ოდირის“ სადამკვირვებლო მისიის წარმომადგენლების შეხვედრა 12:00 საათზეა ჩანიშნული.

ჯერჯერობით უცნობია, კონკრეტულად ვინ შეხვდებიან დამკვირვებლებს.

დაგეგმილი შეხვედრის შესახებ დღეს „ქართული ოცნების“ ერთ-ერთმა ლიდერმა, მამუკა მდინარაძემაც განაცხადა.

მამუკა მდინარაძის განცხადებით, პარტიის ლიდერები დამკვირველბებისთვის საარჩევნო პროცესის შესახებ, ბოლო დროს განვითარებულ მოვლენებთან დაკავშირებით აპირებენ ინფორმაციის მიწოდებას.

საარჩევნო უბნებზე ხმების 100% დათვლილია. შედეგები ასეთია: „ქართული ოცნება“ – 48,22%; „ნაციონალური მოძრაობა – გაერთიანებული ოპოზიცია“ – 27,18%; „ევროპული საქართველო“ – 3.79%; „ლელო“ – 3,16%; „პატრიოტთა ალიანსი“ – 3,14%; „სტრატეგია აღმაშენებელი“ –3,15 %; „გირჩი“ – 2,89%; „ალეკო ელისაშვილი – მოქალაქეები“ – 1,33%; „ლეიბორისტული პარტია“ – 1%. რაც შეეხება დანარჩენ პარტიებს, მათ ამომრჩეველთა ხმების ერთ პროცენტზე ნაკლები აქვთ. საერთაშორისო დამკვირვებლებმა დაადასტურეს, რომ საქართველოში საპარლამენტო არჩევნებზე ფუნდამენტური თავისუფლება და პროცედურების უმეტესობა დაცული იყო.

ოპოზიციის ნაწილი ამ შედეგებს არ ეთანხმება, სადამკვირვებლო მისიის შეფასებებსაც უნდობლობას უცხადებს და საპარლამენტო მანდატებზე უარის თქმას აანონსებს.