„წლების წინ, ჩემს სამშობლოზე ძალიან ნაწყენი, საქართველოდან გამოვიქეცი და იტალიაში აღმოვჩნდი 29 წლის გოგო, სრულიად მარტო, ყოველგვარი ნაცნობის, ახლობლის, ზურგის, ფინანსების და ენის ცოდნის გარეშე.“
exclusivetetv.ge-ს ჟურნალისტი და იტალიის ბიუროს დირექტორი, ნინა მამუკაძე-სორდინი, დღეს იტალიის მოქალაქე ოფიციალურად გახდა. ჟურნალისტი, იტალიის მოქალაქეობის მიღების და ფიცის დადების შემდეგ მკითხველს იმ ისტორიას უზიარებს, რომელიც მან ემიგრაციაში განვლო.
„გოგონა, რომელმაც ერთადერთი ატირებული პატარა შვილი ბებიასთან დატოვა და უკეთესი მომავლის იმედით ბებერი ევროპის კარს მიადგა. ძალიან შემეშინდა!
მახსოვს, ვიდექი რომის დიდ აეროპორტში, პატარა ჩანთით და ვფიქრობდი – ახლა რა ვქნა?!
მაშინ, ისიც კი არ ვიცოდი, რომ “ჩაო” მისალმებასაც ნიშნავდა და დამშვიდობებასაც. ჩემ წინ ოკეანე იყო და მე ცურვა უნდა მესწავლა, თანაც დაუყოვნებლივ. და მე შევცურე ოკეანეში ჩვილი ბავშვის ინსტინქტით…
… და მე ვისწავლე ცურვის არაერთი სახეობა
დაახლოებით 3 თვეში, უკვე ვსაუბრობდი იტალიურად; იმ პერიოდში გამოვიდა კანონი და ჩამოსვლიდან 9 თვეში გავაკეთე მოთხოვნა საბუთებზე და ერთ წელში უკვე მქონდა ბინადრობის ნებართვა; პირველი ჩამოსვლიდან 20 თვეში შევძელი საქართველოში ჩასვლა და ჩემი შვილის ჩახუტება; პირველი ჩამოსვლიდან 2 წელში დავიწყე დაცვისა და უსაფრთხოების კომპანიაში მუშაობა, ხოლო ჩამოსვლის თარიღიდან ორწელიწად-ნახევარში თარჯიმნად მუშაობა სხვადასხვა ოფიციალური უწყებებისთვის; ვიზრუნე, რომ ამეღო იტალიური მართვის მოწმობა, რათა ვყოფილიყავი სრულიად დამოუკიდებელი; ჩამოსვლიდან 4 წელში, ჩემთან წამოვიყვანე ჩემი შვილი; შევხვდი ჩემი ცხოვრების მამაკაცს და ვიქორწინეთ.
ამ ყველაფრის პარალელურად ვცდილობდი არ დამეკარგა ჩემი პროფესია და პერიოდულად ვწერდი სხვადასხვა გამოცემებისთვის, მაგრამ გასული წლის შემოდგომიდან, შეიძლება ითქვას, ისევ თავით გადავეშვი ჟურნალისტიკაში და ექსკლუზივტვ-ის ჟურნალისტი, იტალიის ბიუროს რედაქტორი ვარ და მაქვს საავტორო გადაცემა “ნინას ესპრესო”.
ის, რაც დღეს ჩემს ცხოვრებაში მოხდა, ამ ყველაფრის ლოგიკური გაგრძელებაა. დღეს მე იტალიის მოქალაქე გავხდი, თუმცა მიუხედავად იმისა, რომ საქართველომ ძალიან მაწყენინა, ჩემი დიდი სურვილი იყო, რომ შემენარჩუნებინა საქართველოს მოქალაქეობაც და ასეც მოვიქეცი.
გმადლობ, საქართველო!
გმადლობ, იტალია!“ – წერს ნინა მამაუკაძე-სორდინი.
კომენტარები