საქართველოს დამოუკიდებლობის დღეს – 26 მაისს გენერალ გიორგი კვინიტაძეს მთაწმინდის მწერალთა და საზოგადო მოღვაწეთა პანთეონში სამხედრო პატივით დაკრძალავენ.
მას შემდეგ, რაც თავისუფლების მოედანზე „ჩაკრულო“ შესრულდება და მოდერნიზებული „სუ -25“-ის საბრძოლო თვითმფრინავები საქართველოს დროშის ფერებში გადაიფრენენ, ღონისძიება სამების საკათედრო ტაძარში გადაინაცვლებს, სადაც გენერალ კვინიტაძის სამოქალაქო პანაშვიდი ტარდება. მის ცხედარს დღეს მთაწმინდის პანთეონში, ქაქუცა ჩოლოყაშვილის გვერდით, სამხედრო პატივით დაკრძალავენ.
ცერემონიას ქვეყნის პრეზიდენტი, პრემიერი, პარლამენტის თავმჯდომარე და თავდაცვის მინისტრი დაესწრებიან. გენერალ კვინიტაძის საფრანგეთიდან გადმოსვენება, პირადად ირაკლი ღარიბაშვილის ძალისხმევით მოხერხდა. მთავრობის მეთაურმა ამ საკითხზე მუშაობა თავდაცვის მინისტრობის პერიოდში დაიწყო.
ცნობისთვის, გენერალ გიორგი კვინიტაძის მემორიალური ნივთები ოჯახის წევრებმა საქართველოს ეროვნულ მუზეუმს გადასცეს. გამოფენას პრეზიდენტი, თავდაცვის ძალების წარმომადგენლები და გენერლის ოჯახის წევრები დაესწრნენ
საქართველოს პირველი რესპუბლიკის ჯარების მთავარსარდლის ნეშტი საფრანგეთიდან სამშობლოში 22 მაისს გადმოასვენეს.
გიორგი კვინიტაძე 1874 წლის 21 აგვისტოს დაიბადა. მან სამხედრო განათლება თბილისსა და პეტერბურგში მიიღო. საქართველოს პირველი რესპუბლიკის შექმნამდე, 1917 წლის მეორე ნახევრიდან, აქტიურად მონაწილეობდა ქართული შეიარაღებული ძალების ჩამოყალიბების პროცესში. დიდი წვლილი შეიტანა, 1919 წელს, ქართული სამხედრო სკოლის დაარსებაში და იყო მისი პირველი ხელმძღვანელი. 1918-1921 წლებში აქტიურად მონაწილეობდა სხვადასხვა ფრონტზე მიმდინარე საბრძოლო მოქმედებებში. რუსეთ-საქართველოს 1921 წლის ომის მიმდინარეობისას, 16 თებერვალს, ხელმეორედ დაინიშნა შეიარაღებული ძალების მთავარსარდლად.
საბჭოთა რუსეთის მიერ საქართველოს ოკუპაციის შემდეგ, გენერალი კვინიტაძე, მთავრობისა და სარდლობის სხვა წარმომადგენლებთან ერთად, ემიგრაციაში წავიდა. ცხოვრობდა საფრანგეთში, სადაც 1970 წელს გარდაიცვალა.
კომენტარები