“დღეს, აქ დასრულდა ოცნების მანდატი, გინდათ, ხალხო, აიღოთ ძალაუფლება ხელში?” – აკია ბარბაქაძე

თადარიგის პოლკოვნიკი, აკია ბარბაქაძე, რუსთაველზე გამართულ აქციაზე სიტყვით გამოსვლისას, ამბობს:

“კითხვა მაქვს თქვენთან, ხალხო – ოკუპირებულ ქვეყანაში რა არის მთავარი ამოცანა? ქვეყნის გათავისუფლება, დეოკუპაცია – ეს არის ჩვენი ამოცანა.

ჩვენ სოლიდარულები ვართ იმ ომში, რომელიც უკრაინაში წარმოებს, მაგრამ აქ არანაკლები ომია, აქ თუ არ სკდება ჭირვები, აქ სხვა მსხვერპლია, აქ თუ ბრძოლის ველზე არ იღუპება ხალხი, აქ გარბიან ამ ქვეყნიდან. დაღუპული და შინმოუსვლელი ერთი და იგივეა. ჩვენ უნდა შევცვალოთ ეს მოცემულობა. დღეს აქ, ამ მოედანზე, მოედანზე, სადაც საკრალულ ადგილას ვიკრიბებით ხოლმე ყოველთვს, როცა მნიშვნელოვანი წყდება, ჩვენი ქვეყნის ისტორიაში, ამ კედლებს, ამ შენობებს ახსოვს მრავალი გამარჯვება და სამწუხაროდ, მარცხიც, მაგრამ გამარჯვება უფრო ბევრი და სიამაყეც, ის ღირსებაც რომელიც ყოველთვის გვქონდა, როდესაც 9 აპრილს შიშველი ხელებით ტანკებს ვაჩერებდით – რაღაც ვერა ვგრძნობ იმ სიამაყეს დღეს აქ, რაღაც სხვანაირად გვაქვს თვალები დახრილი.

ეს უნდა დავასრულოთ, დღეს, აქ ამ მოედანზე, დასრულდა ოცნების მანდატი, მანდატი არის აი აქ, თქვენში, ძალაუფლების წყარო არის ხალხი, კონსტიტუცია ამას გვეუბნება. თქვენშია ძალაუფლება, გინდათ ხალხო აიღოთ ძალაუფლება ხელში? – აქ არის. აწიეთ ხელი, ვის გინდათ ძალაუფლება – აი, ეგ არის ნამდვილი მანდატი, ეს არის ნამდვილი ძალაუფლება, თქვენ შეგიძლიათ ერთ წამში დაასრულოთ ყველაფერი, პოლიტიკოსები ვართ თქვენი ნების აღმსრულებლები, რა გინდათ თქვით? – გინდათ რეალური თავისუფლება? გინდათ გამარჯვება? – აქ არის. უნდა ჩამოვაყალიბოთ ანტიკოლაბორაციული საბჭო, უნდა გადავდგათ ნაბიჯი, უნდა შევიყვანოთ ყველა პროდასავლური პოლიტიკური ძალა, თითო წარმომადგენელი და უნდა ვაიძულოთ ერთმანეთი, ყველა პოლიტიკური ძალა , რომ აღასრულონ ნება თქვენი. ნება ღვთისა, ნება ერისა აქ არის. ნუ გეშინიათ, უფალი მებრძოლთან არის, უფალი ყოველთვის მაშინ იყო ჩვენ გვერდით, როცა ვიბრძოდით, ვიბრძოდით ცალად, ერთად, მაგრამ სულ ვიბრძოდით.

ორშაბათიდან ვიწყებთ პერმანენტულ აქციებს, ამ საბჭოში შემოვა ყველა, ნაციონალური მოძრაობა, შალვა ნათელაშვილი და კიდევ ბევრი, ყველა პარტიას დაველაპარაკებით კიდევ ერთხელ და ვიტყვით რომ ძალა ერთობაშია. ჩვენ უნდა დავბრუნდეთ ჩვენ ფესვებთან, ჩვენ უნდა დავასრულოთ ეს მონობა, რომელიც აქ არის, აი, მაშინ დავდგებით ღირსეულად უკრაინელების გვერდზე. მაშინ ექნება ფასი ჩვენ თანადგომას და სოლიდარობას, თორემ ახლა, უკუდო ხარი სხვებს ბუზებს უგერიებდაო, აი, ეგ არის ჩვენი რეალობა, აქა ვართ დღეს.

არ უნდა დავიღალოთ, უნდა გამოხვიდეთ, მეტი არაფერი არ არის საჭირო. უნდა დადგეთ და მოითხოვოთ და ჩვენ გავაკეთებთ იმას, რაც თქვენ გინდათ და თქვენ გექნებათ ღირსეული ცხოვრება. აღარ იქნება მშიერი, აღარ იქნება მათხოვარი ამ ქვეყანაში, სადაც უკუღმა მარცვალი რომ გადააგდო, წაღმა ამოვა. აქ შიმშილობს ხალხი, მთელი მსოფლიო რომ შიმშილობდა, საუკუნეების წინ, აქ ყველა მაძღარი იყო, მათხოვარი არ გვყავდა და გაგვამათხოვრეს. ერთმა ჩია კაცმა გაგვამათხოვრა. უნდა დავასრულოთ!

ძალიან ცოტაა გასაკეთებელი, ძალიან ადვილია ამ ძალის გაშვება, რუსეთი დამარცხებულია, რუსეთი შეშინებულია, პუტინი სად დაიმალოს ჯურღმულში იმას ფიქრობს და ახლა, როცა მთელი მსოფლიო გაერთიანდა, იმ ხალხს დაეწყოს შიშები, ვინც მარტო ებრძოდა ამ ურჩხულს? – არა, არ დავაბრუნებთ ბოლშევიზმს, ფაშიზმს, ჩვენ თუ ერთად არ დავდექით და არ დავამარცხეთ ესენი, ფაშიზმს აშენებენ აქ, ჯაშუშებს ეძებენ აქ თქვენში, ყველაში, ამათ უნდათ ბოლომდე ამოგხადონ სული, ეს არის მოცემულობა და სიმართლე.

თქვენ ხელშია ძალაუფლება, რასაც თქვენ იტყვით ის გაკეთდება. ორშაბათიდან ვიწყებთ მოძრაობას. გამოხვალთ ამდენი? – სამ დღეში დასრულდებიან, გამოხვალთ ნაკლები? – ერთ კვირაში, მაგრამ მაინც დასრულდებიან.”