7 მარტს საქართველოში, ძირითადად ქვეყნის დასავლეთ ნაწილში, მოსალოდნელია წვიმა, მთაში თოვლი, ზოგან ძლიერი, შესაძლებელია ნისლი და ქარბუქი, დროგამოშვბით დასავლეთის მიმართულების ძლიერი ქარი, ზღვაზე 3-4 ბალიანი ღელვა. 7 მარტს დასავლეთ, ხოლო 8 მარტს აღმოსავლეთ საქართველოში მოსალოდნელია ჰაერის ტემპერატურის მნიშვნელოვანი დაკლება.
მოსალოდნელმა ძლიერმა ნალექებმა, შესაძლებელია, დასავლეთ საქართველოს მდინარეებზე წყლის დონეების მნიშვნელოვანი მატება, ხოლო ქვეყნის მთიან ზონებში თოვლის ზვავების ფორმირება და მეწყრული პროცესების ჩასახვა – გააქტიურება გამოიწვიოს.
როგორც „იმედნიუსს“ გარემოს ეროვნულ სააგენტოში განუცხადეს, მოსალოდნელია ძლიერი ქარიც.
„დღეს საქართველოში მოსალოდნელია ცივი და ნოტიო ჰაერის მასების გავრცელება. მკვეთრად დაეცემა ტემპერატურა და მხოლოდ 3-8 გრადუსი იქნება დაბლობში. დასავლეთ საქართველოში უნდა ველოდოთ თოვლს, შავი ზღვის სანაპირო რეგიონებში ქარი გაძლიერდება. ეს ეხება არა მხოლოდ ზღვისპირეთს, არამედ – მტკვრის ხეობასაც; თბილისის გარეუბნებშიც, შესაძლოა, 30 მ/წმ-მდე დაფიქსირდეს ჩრდილო-დასავლეთის მიმართულების ქარი. ზღვაზე მოსალოდნელია ღელვა და შტორმიც. ქარის ეს შემოჭრა არის ხანმოკლე და მხოლოდ დღესაა მოსალოდნელი. თუ დღეს ტემპერატურა დასავლეთ საქართველოში დაეცემა, 8 მარტს აღმოსავლეთ საქართველოშიც მკვეთრად დაიწევს ნიშნული. ასევე, მოსალოდნელია ნალექი – უმეტესად, თოვლის სახით, მათ შორის – თბილისშიც. დღეს ქარი დასავლეთ საქართველოშიცაა მოსალოდნელი და აღმოსავლეთითაც. ორშაბათს თბილისში ღრუბლიანი, ნისლიანი, ცივი ამინდი იქნება და ნალექს უნდა ველოდეთ თოვლის ან თოვლჭყაპის სახით, თუმცა, ქარი აღარ იქნება“ – აცხადებს ჰიდრომეტეოლოგიური პროგნოზების სამმართველოს უფროსი სვეტა ნიორაძე.
კომენტარები