დღეიდან ავსტრიაში საყოველთაო ლოკდაუნის რეჟიმი ამოქმედდება. ლოკდაუნის რეჟიმი 13 დეკემბრამდე გაგრძელდება.
„კორონავირუსთან დაკავშირებული სიტუაციის სერიოზულობის გამო, სხვა არჩევანი არ გვრჩება. შეზღუდვები უნდა დავაწესოთ ყველასთვის, რათა ჩვენი თავი და ჯანდაცვის სისტემა დავიცვათ. 22 ნოემბრიდან საყოველთაო ლოკდაუნი გამოცხადდება, რომელიც 10 დღის შემდეგ გაანალიზდება და 13 დეკემბერს ავტომატურად დასრულდება“, – აღნიშნა ავსტრიის კანცლერმა.
ლოკდაუნის რეჟიმის ფარგლებში, შეჩერდება კულტურული დაწესებულებების, სავაჭრო ცენტრების, სასტუმროების, საშობაო ბაზრობების, სილამაზის სალონების, კაფეებისა და რესტორნების მუშაობა. გარდა ამისა, უქმდება მასობრივი ღონისძიებები და სახლიდან გასვლაზე შეზღუდვა წესდება.
14 ნოემბერს, ავსტრიის მთავრობამ არავაქცინირებულებისთვის ლოკდაუნი გამოაცხადა.
20 ნოემბერს, ავსტრიის მოქალაქეებმა ვენის ქუჩებში საპროტესტო აქცია გამართეს. დემონსტრანტებმა წინა დღეს მთავრობის მიერ გამოცხადებული ლოკდაუნი და ახალი გადაწყვეტილება გააპროტესტეს, რომლის მიხედვითაც, მომავალი წლის პირველი თებერვლიდან ავსტრიაში ვაქცინაცია სავალდებულო გახდება.
კომენტარები