„დელტაკრონი“ ლაბორატორიული დამუშავების შეცდომის შედეგია? – ჯანდაცვის ექსპერტები ახალი კოვიდმუტაციის შესახებ ინფორმაციას არ ენდობიან

ჯანდაცვის ექსპერტები ეჭვქვეშ აყენებენ ცნობებს შესაძლო კოვიდმუტაციის, „დელტაკრონის“ შესახებ, რომელიც სავარაუდოდ, ლაბორატორიული დამუშავების შეცდომის შედეგია.

9 იანვარს ინფორმაცია გავრცელდა, რომ კვიპროსზე კორონავირუსის ახალი შტამი – „დელტაკრონი“ აღმოაჩინეს. ვირუსის ვარიაციას სახელი ორი შტამის – „დელტასა“ და „ომიკრონის“ შერწყმის გამო დაარქვეს.

ზოგიერთი ექსპერტი ეჭვქვეშ აყენებს აღნიშნულ დასკვნებს. ჯანდაცვის მსოფლიო ორგანიზაციის ერთ-ერთმა ოფიციალურმა პირმა განაცხადა, რომ „დელტაკრონი“ არარეალურია და სავარაუდოდ, განპირობებულია სეკვენირების არტეფაქტით – არაბიოლოგიური პროცესით შემოღებული ვარიაცია.

ჯანდაცვის მსოფლიო ორგანიზაციის ექსპერტმა, კრუტიკა კუპალიმ აღნიშნა, რომ ამ შემთხვევაში, სავარაუდოდ, ადგილი ჰქონდა „დელტა“ შტამის ნიმუშში „ომიკრონის“ ფრაგმენტების ლაბორატორიულ დაბინძურებას.