“მთელი საქართველო ელოდება პრემიერ-მინისტრის მიერ წელს დაანონსებული განათლების სფეროს მასშტაბური რეფორმირების დაწყებას. იმედია, ეს პროცესი არა მხოლოდ დაიწყება, არამედ დარგის სპეციალისტებისა და საზოგადოების ფართო წრეების მონაწილეობით წარიმართება“, – წერს სოციალურ ქსელში „ხალხის ძალის“ წევრი დავით ქართველიშვილი, რომელიც ქვეყანაში სხვადასხვა პროფესიის წარმომადგენლების მიერ მოწყობილ საპროტესტო მსვლელობებს აფასებს.
როგორც ექსპერტი აღნიშნავს, სხვადასხვა პროფესიების წარმომადგენლების პერფორმანსების შემდეგ საჭირო გახდება ყველა პრობლემური საკითხის განხილვა იმ სფეროების მიხედვით, რომლებმაც ეს პრობლემები წარმოაჩინეს.
„ჩაიარა გაფიცულ დიზაინერთა მარშმა, რომლებიც პროტესტის ნიშნად, თავის 2025 წლის გაზაფხულ/ზაფხულის კოლექციებში აღარ გამოიყენებენ რუსული „ტრიკოლორის“ ფერების ქსოვილებს და ამას რამენაირად უნდა შევეგუოთ. გაიფიცა საქართველოში რეგისტრირებული ბიზნესის 0,55% – და ესეც ყურადსაღებია. მნიშვნელოვანია და ამას ყოველგვარი ირონიის გარეშე ვიძახი, დაახლოებით ასეთივე პროცენტული მაჩვენებლის მქონე სტუდენტების თუ პროფესორების წუხილის გათვალისწინება, ვინაიდან პრობლემები არსებობენ, ოღონდ მათ პიროტექნიკით ვერ დაამარცხებ.
ჩაივლის უკანასკნელ პროფესიათა წარმომადგენლების პერფორმანსები და საჭირო გახდება ყველა პრობლემური საკითხის განხილვა იმ სფეროების მიხედვით, რომლებმაც ეს პრობლემები წარმოაჩინეს. ჩემსავით მთელი საქართველო ელოდება პრემიერ-მინისტრის მიერ წელს დაანონსებული განათლების სფეროს მასშტაბური რეფორმირების დაწყებას. იმედია, ეს პროცესი არა მხოლოდ დაიწყება, არამედ დარგის სპეციალისტებისა და საზოგადოების ფართო წრეების მონაწილეობით წარიმართება.
ყველაფერი იწყება სკოლით, თუკი ოჯახით, სამწუხაროდ, ვეღარ იწყება. თუკი ვეღარ იწყება ეკლესიით, რომელიც ღვთისმშობლის წილხვდომილ საქართველოში საზოგადოების საკმაოდ დიდი ნაწილის მხრიდან პასიური, ხოლო არცთუ პატარა ნაწილის მხრიდან – ღია დაცინვის, ზიზღის, სიძულვილის, შეურაცხყოფისა და იგნორის ობიექტი ხდება. ანუ, ეს უმნიშვნელოვანესი სფეროც მოსაწესრიგებელია. ოღონდ როგორ და რანაირად – ეკლესიის საქმეებში ჩვენ ვერ ჩავერევით.
რისი თქმა მინდა…პიროტექნიკის გამოყენებით ბრძოლა კი „გამარჯვებით“ დასრულდა, მაგრამ ეს ჯერ კიდევ არ არის საბოლოო გამარჯვება. დაყოფილი ოჯახების პირობებში, საახლობლოში გაჩენილი გაუცხოების და შეუთავსებლობის ფონზე, სტიგმებისა და სიცრუის ერთობლივი (!!) დამარცხების გარეშე ეს მუდმივი „სეისმოაქტიური“ ფაზები არსად გაქრება“, – წერს დავით ქართველიშვილი.
კომენტარები