ჭყონდიდელი მიტროპოლიტი სტეფანე კალაიჯიშვილი იღუმენ დანიელს ბოლო გაფრთხილებას აძლევს. შესაბამისი დოკუმენტი გუშინ, 25 მაისს გამოქვეყნდა.
როგორც გამოქვეყნებული დოკუმენტში წერია, იღუმენი დანიელი, საეპარქიო კომისიას უფლებას არ აძლევს, რომ სალხინოს მონასტერში არსებული ქონების აღწერა და ეპარქიის ახალი მმართველებისთვის გადაბარება მოხდეს და აღნიშნულ მონასტერში არც მიტროპოლიტი სტეფანეს მიერ გაგზავნილ პირებს აძლევს მსახურების ჩატარების უფლებას.
დოკუმენტში აღნიშნულია, რომ თუ 29 მაისამდე იღუმენი დანიელი არ დაემორჩილება ეპარქიის ახალი მმართველის მოთხოვნას, რაც გულისხმობს დადიანების სასახლის, ღვინის სახლის, მონასტრის მარნისა და მოურავის სახლის გადაღებების გადაცემას და აღწერისა და გადაბარების პროცესის ხელშეწყობას, ჭყონდიდის მიტროპოლიტი იღუმენის სამღვდელო ხარისხიდან განკვეთისგადაწყვეტილებას მიიღებს.
შეგახსენებთ, ჭყონდიდის ეპარქიაში დაპირისპირების დაწყება ეპარქიის მმართველის ცვლილებას უკავშირდება, ეპარქიის ყოფილი მიტროპოლიტი პეტრე ცაავა სინოდმა დესტრუქციულ ქმედებებს და საქართველოს კათოლიკოს-პატრიარქისა და წმინდა სინოდის წევრების წინააღმდეგ ცილისმწამებლურ კამპანიაში დაადანაშაულა და ეპარქიის მმართველობა ჩამოართვა. პეტრე ცაავას მხარდამჭერები გადაწყვეტილებას უსამართლოდ მიიჩნევენ და საპატრიარქოსგან ითხოვენ, რომ ან პეტრე ცაავას დანაშაული დაამტკიცონ, ანდა ის ეპარქიაში დააბრუნონ.
ეპარქიის ახალ მმართველს სტეფანე კალაიჯიშვილს სასულიერო პირების ნაწილი არ ემორჩილება და მას უკანონო ქმედებებში ადანაშაულებს.
კომენტარები