“დამნაშავეების კოალიციაც ხომ არის ერთადერთი გამოსავალი ჯერ კიდევ?” – ბექა წიქარიშვილი

მოძრაობა „თეთრი ხმაურის“ დამფუძნებელი ბექა წიქარიშვილი, სოციალურ ქსელში ჩვენ ქვეყანაში შექმნილ პრობლემებზე საუბრობს.

წიქარიშვილის პოსტს უცვლელად გთავაზობთ:

„პერიფერიებშიც და პერიფერიულ ცენტრებშიც აბსოლუტურ უმრავლესობას მუდმივი წყალი არ აქვს, 500 ლარიანი სამსახურები სანატრელი აქვს ხალხს, სიღარიბე შლის და ცლის სოფლებს და მუნიციპალიტეტებს, დაბერებულია მოსახლეობა, დაბერებულია უმცირესობაში დარჩენილი ახალგაზრდობა, უპერსპექტივობით, უმოქმედობით და ორივესგან გამოწვეული ცხოვრების წესით – სმა, მოწევა, გულს გადაყოლების, ტკივილის გაყუჩების და ურთიერთობების ერთადერთი საშუალებებია, თუ არ ჩავთვლით ზემოდან გამაღატაკებელ და დამტრამვავ აზარტული თამაშების მაფიას, კაზინოებს, რომლებიც ჯიბით დააქვთ. კულტურული ცხოვრების ნარჩენები ობმოდებულია, ლუკმაპურის და წამლის ფული მთავარი საზრუნავი, შიმშილი ჩვეულებრივი, ნორმალიზებული მოვლენა, პენსია/შემწეობა/გზავნილები გადარჩენის ძირითადი წყარო …

ამ ვითარებაში მყოფ მოსახლეობას პოლიტიკური ელიტა არც ამ რეალობაზე და აღარც გამოსავალზე აღარ ესაუბრება – პირდაპირ შოუებს აწვდის. ყველამ აღიარა, რომ მათგან გამოსავალზე საუბარი მამის მკვლელია მამის საფლავზე. სამაგიეროდ საოცრად დაიხვეწნენ შოუმენობაში, ვეღარ გაარჩევ პოლიტიკოსია, როკ-სტარი თუ პანტომიმის მსახიობი. მაყურებელშიც ისე მიდის საუბრები, იფიქრებ პოლიტიკის ფუნქცია მართლაც შოუ ყოფილა. ვისაც თითქოს ჭკუა უნდა მოეკითხებოდეს ‘პოპკორნით’ ზის, ძველი ნაძირლის ახალ როლსა და ნიღაბს მისჩერებია და გულშემატკივრობს, მეტიც, მოგვიწოდებს ინერტულნი ნუ ვიქნებით, ქვეყნის ბედიო, ჩაებით ამ ფერხულში, იგრძენი შოუს ძალა საკუთარ თავზე, ეს ხომ სასწაულმოქმედი შოუებია, რომლებიც ჯალათებს წმინდანებად აქცევენ, გაუპატიურებას სიყვარულად დაგანახვებენ, წამებას – ალერსად.

ვაკეში ხომ კარგადაა ჭკვიანი ნაგვის ურნები?

სისტემური დანაშაულებიც ხომ ლამაზად გაგვიქარწყლეს სისტემურმა დამნაშავეებმა? ხომ გახდნენ დევნილები რომ ნამდვილი დევნილები აღარც გაგვახსენდეს?

დამნაშავეების კოალიციაც ხომ არის ერთადერთი გამოსავალი ჯერ კიდევ?
„Telemundo Presenta“ სულ მცირე, ცოტა მეტი მოგვეთხოვება!“, – წერს ბექა წიქარიშვილი.