ჟურნალისტი, ლაშა ბერულავა:
ნამდვილი ამბავი:
კარგად ცნობილ სოფელ ატოცში, ქვედა მიმართულებაზე, პირველი მავთულხლართები 2013 წელს გაავლეს. ატოცში მაშინ სიტუაციას შსს-ს სპეცრაზმი აკონტროლებდა. ერთერთი დანაყოფის ხელმძღვანელი ვიცე-პოლკოვნიკი იყო, მეტსახელად “კადაფი”: აფხაზეთში ნაომარი, პატრიოტი, მკაცრი, დისციპლინის მოყვარული ყოფილა.მავთულხლართების გავლების მეორე დღეს დილიდან უხასიათოდ იყოო, თვითმხილველები ჰყვებიან.როცა პოსტზე (მაშინ ზემო ატოცში პოლიციის პოსტები ჯერ კიდევ არ იყო გაუქმებული) სადილი მოიტანეს, პატარა სუფრა გაიშალა და პოლიციელები მიუსხდნენ, “კადაფი” უცებ წამოხტა, პური მაგიდაზე დაახეთქა და წამოიძახა: “რა მაჭმევს პურსა, რა!..”, – მერე კი “პიკაპს” მოახტა, დაქოქა და პირდაპირ მავთულხლართებისკენ აიღო გეზი, დაერია ბოძებს და სულ წააქცია – ზემოდან ქვემოთ ჩაუყვა ასე, მერე ეს ბოძები მოაგროვა, მანქანის ღია ძარაზე დაყარა, რაც დაეტია და ატოცის პოლიციაში ჩაიტანა, იქ გადმოცალა და გაოგნებულ კოლეგებს უთხრა: ეს მე გავაკეთე პირადად, სხვებს არაფერი დააბრალოთ და რაც უნდათ, ის მიქნანო…
დიდი ამბავი ატყდა: ევროკავშირის დამკვირვებლები, ატოცში ოსური და რუსული მხარეები, ცხელ ხაზზე რეკვა… “კადაფი” თბილისში დაუბარებიათ სასწრაფოდ, თუმცა, დაკავებას და სისტემიდან გაშვებას მხოლოდ იმიტომ გადაურჩა, რომ ირაკლი ალასანია (მისი გაზრდილი ყოფილა, ალასანია კი იმ დროს თავდაცვის მინისტრი იყო) გამოსარჩლებია.“კადაფი” თავდაცვის სამინისტროს სათაო ოფისში, კაბინეტურ სამუშაოზე გადაიყვანეს, ატოცში პოლიციის პოსტი გააუქმეს, რუსმა ოკუპანტებმა კი მავთულხლართები ხელახლა გაავლეს და სამუშაოები ორ დღეში დაასრულეს…
კომენტარები