პოლიტოლოგი, ლევან ლორთქიფანიძე:
მგონი, მაინცდამაინც სწორი არ უნდა იყოს ჩუმად ყოფნა. ჩვენც, ამ ქვეყნის შვილებსაც გვაქვს უფლება ვიმსჯელოთ მომავალი კათალიკოსის შესახებ. სანამ ზოგიერთები უბრალო მოსაზრების გამოთქმასაც კი გვიკრძალავენ, ძალაუფლების მქონენი ყველა ინსტრუმენტს იყენებენ წყლის ასამღვრევად.
სულიწმინდაზე, მის მადლზე სხვებმა ისაუბრონ, მე ამქვეყნიური კრიტერიუმების შესახებ მოგახსენებთ. ხაზს ვუსვამ, ამქვეყნიური!
რა ამქვეყნიური თვისებები დაამშვენებდა მომავალ კათალიკოსს?
1. ახალ ეპოქაში კათალისკოსი სულ მცირე ღვთისმეტყველების მაგისტრი მაინც ხომ უნდა იყოს? მეცნიერულ დონეზე ხომ უნდა ჰქონდეს შესწავლილი ქრისტიანობა? მხოლოდ რელიგიური განათლებაც არ არის საკმარისი სასულიერო ლიდერისთვის. ის ინტელექტუალი უნდა იყოს და თანამედროვე მსოფლიოში მიმდინარე დისკუსიებში კარგად უნდა ერკვეოდეს.
აღსანიშნავია ისიც, რომ დამოუკიდებელ საქართველოში ახალგაზრდებს რუსული სასულიერო აკადემიების მიღმაც შეეძლოთ განათლების მიღება. შესანიშნავი იქნებოდა, რომ მომავალ პატრიარქს ქართულთან ერთად დასავლური განათლებაც ჰქონდეს მიღებული.
მომავალი კათალიკოსი სამღვდელოებაში სასულიერო და საერო ცოდნის გავრცელების მთავარი ხელშემწყობი უნდა იყოს.
კარგი განათლება არის ერთ-ერთი (და არა ერთადერთი) წინაპირობა სიმშვიდის, სიწყნარის, თავდაჯერებულობის, ამცირებს კონფლიქტებსა და აგრესიას…
2. მთელი საქართველო შეაშფოთა იმან, რომ პატრიარქის ჰოსპიტალიზაციის შემდეგ, საავადმყოფოში ერთ-ერთ პირველ ჭირისუფლად ვანო ჩხარტიშვილი გამოცხადდა. ადრეც მრავლად გვინახავს ამ ავაზაკის ოჯახის წევრები დახურულ, ელიტურ შეკრებებზე საპატრიარქოში.
ცხადია, ეკლესია ყველასია და ცოდვილებს განსაკუთრებით მფარველობს. უბრალოდ, ჩვენ ვისურვებდით, რომ მომავალ კათალიკოსს არასდროს დაავიწყდეს ჩაგრულთა გვერდით დგომა. ვსაუბრობ თანადგომაზე და არა ქველმოქმედებაზე. ქველმოქმედებაა ასდოლარიანების დარიგება და მათხოვრებისთვის სუფრის გაშლა, ჩაგრულთა თანადგომა კი მჩაგვრელებისთვის ადგილის მიჩენას გულისხმობს.
შარშან გაფიცულ ჭიათურელებთან მხოლოდ მეუფე დანიელი გამოცხადდა, სხვამ ყველამ ანომალიად გამოაცხადა მაღაროელებთან კომუნიკაცია. უბრალოდ, შემდეგ გაქრა მისი მაღალყოვლადუსამღვდელოესობა და შუამავლის ფუნქციის შესრულება ვერ შეძლო.
ალბათ, ბევრმა რამ დააბრკოლა იგი, მაგრამ ჩემი ყურადღება ერთმა მოვლენამ მიიპყრო. მახსოვს, როდესაც მაღაროელებმა მეუფესთან ბიზნესის რეგულირებაზე, ნაციონალიზაციაზე, განვითარების ფონდზე დაიწყეს ლაპარაკი მიტროპოლიტი დანიელი გაოცდა, ბიზნესის შეზღუდვა როგორ შეიძლებაო (მე არ მეგულება არცერთი სასულიერო იერარქი, რომელიც სხვანაირად მოიქცეოდა. მეტიც, შეიძლება მეუფე დანიელივით ბევრი არც მისულიყო გაფიცულებთან). ანუ ვერც დაუშვა, რომ შეიძლება კერძო საკუთრება საჯარო ინტერესის სასარგებლოდ შეიზღუდოს, ვერც დაუშვა…
შეიძლება! შეიძლება! ასეთი ამბები არ უნდა უკვირდეთ იერარქებს, ელემენტარულია! რატომ უნდა სწამდეს ეკლესიას ეკონომიკური ლიბერალიზმისა და ბაზრის ?!
ჩვენ გვჭირდება პატრიარქი, რომელიც ღარიბების მხარეს იქნება, ჩვენ გვჭირდება ძლიერი სოციალური მსახურება.
3. გასაგებია, რომ რუსეთის იმპერიალისტურ ეკლესიას დიდი გავლენები აქვს აფხაზეთშიც, სამხრეთ ოსეთშიც, დანარჩენ საქართველოშიც. მათ ადვილად შეუძლიათ უზარმაზარი პრობლემები შეუქმნან საქართველოს ეკლესიას. არავინ ითხოვს ცეცხლის გახსნას. უბრალოდ, ამ ქვეყნის ყველა პატრიოტს სურს, რომ საქართველოს ეკლესია ნელ-ნელა, მეთოდურად, წყნარად და მშვიდად მაქსიმალურად დისტანცირდეს РПЦ-სგან, რომელიც არის სახელმწიფო უწყება, ექვემდებარება კრემლს, სურს იესო ქრისტესა და იმპერიალიზმის ერთმანეთთან დაკავშირება.
გვჭირდება კათალიკოსი, რომელიც РПЦ-სგან მომავალ საფრთხეს აცნობიერებს და არ ეშინია ამ საფრთხესთან მეთოდური ბრძოლის.
4. ილია II დამოუკიდებელი ფიგურა გახლდათ, არ იყო რომელიმე პოლიტიკურ ძალის ქვეშევრდომი, ცდილობდა ყველა პოლიტიკურ ჯგუფთან ჰქონოდა მისასვლელი გზა, უკანასკნელ მომენტამდე შრომობდა, რათა შუამავლის როლი შეესრულებინა პოლიტიკურ მხარეებს შორის. ის არ ყოფილა რომელიმე პრეზიდენტის ან პრემიერის ქვეშევრდომი. ჰქონდა ქარიზმა, მომხიბვლელობა, იუმორი, იყო მჭევრმეტყველი.
ახალი კათალიკოსი უნდა იყოს დამოუკიდებელი “ქართული ოცნებისა” და ყველა სხვა პარტიისგან და უნდა შეეძლოს ცეცხლოვნად ქადაგება თუ არა, საინტერესოდ ლაპარაკი მაინც. არ უნდა იყოს ყაველაშვილისა და კობახიძის ანალოგი სასულიერო სივრცეში.
5. რატომ უნდა ლაპარაკობდეს ნახევარი საქართველო წისქვილკომბინატებზე, ჯიპებზე, კიკეთის რეზიდენციებზე, იჯარით გაცემულ მიწებსა და მასზე გახსნილ პროფილაქტიკებზე.
დახედეთ კუპიურებს, ვისი ხელმოწერა ამშვენებთ მათ, ნათია თურნავასი, კრისტინ ლაგარტის) მალე დონალდ ტრამპის ხელრთვაც გამოჩნდება …
„მიჩვენეთ ფული, რომლითაც იხდით ხარკს. და მიართვეს მას დინარი. და უთხრა მათ: ვისია ეს ხატი და ეს წარწერა? მიუგეს: კეისრისა. მაშინ უთხრა მათ: მიაგეთ კეისარს კეისრისა, ხოლო ღმერთს – ღმრთისა.“
ფინანსური ანგარიშვალდებულება და გამჭვირვალობა მრევლის წინაშე, ბევრ ცილისწამებას აღმოფხვრიდა და ბევრ ცოდვას ამოძირკვავდა. თან დღეს ხომ ყველასა და ყველაფრის გამჭვირვალობაზე გვესაუბრებიან.
___
კიდევ მრავალი რამის თქმა შეიძლება, მაგრამ აქ გავჩერდები.
ღმერთს შევთხოვ, რომ ეს გაუბედურებული ქვეყანა დაიფაროს, იხსნას განსაცდელისგან, რომელსაც შეიძლება ადგილობრივი და მეზობელი ქვეყნის სპეცსამსახურები (ნარიშკინის მესიჯი ხომ უკვე მივიღეთ) ამზადებდნენ.
კომენტარები