ბიზნესმენი, მოძრაობა „ერთობა, რაობა, იმედი“-ს დამფუძნებელი ლევან ვასაძე საქართველოს დამოუკიდებლობის დღეს მოსკოვში ვიზიტისა და კრემლთან დაახლოებულ რუს პოლიტოლოგთან ალექსანდრ დუგინთან შეხვედრის შესახებ საუბრობს.
ვასაძე განმარტავს თუ რატომ იმყოფებოდა საქართველოს დამოუკიდებლობის დღეს მოსკოვში. ვასაძე ამბობს, რომ ის დუგინს არაერთხელ შეხვედრია.
„მოსკოვში დავფრინავ 1995 წლიდან. მოსკოვში ვცხოვრობდი, 2009 წლიდან საქართველოში გადმოვედი დიდი ბრიტანეთიდან და მოსკოვში რეგულარულად დავფრინავ თვეში ერთხელ, ზოგჯერ, კვირაში ერთხელ.
27 მაისს გვქონდა დანიშნული ჩვენი კომპანიის დირექტორთა საბჭოს სხდომა, რომლის აქციონერობაც მე არასდროს არ დამიმალავს. მოგეხსენებათ, მოსკოვსა და თბილისს შორის არ არსებობს პირდაპირი რეისები, არის კვირაში 2-ჯერ სომხეთის გავლით, ოთხშაბათს და შაბათს. ოთხშაბათი იყო 26 მაისი, ამიტომ, მე წინა დღეს ჩამოვფრინდი მოსკოვში, რათა დავსწრებოდი დირექტორთა საბჭოს სხდომას 27-ში. ეს არის და ეს.
რაც შეეხება ალექსანდრე დუგინთან ჩემს შეხვედრას, მას არაერთხელ შევხვედრივარ, მას შემდეგ, რაც გადავწყვიტე, შემომეტრიალებინა საქართველოსთვის, ესეც ცნობილი ფაქტია. 2015 წელს გავიცანი და არაერთხელ მითქვამს საჯაროდ, რომ ჩვენი შეხვედრის დღიდან დუგინს საქართველოზე ცუდი არაფერი უთქვამს, უფრო მეტიც, ის იყო და არის ერთადერთი რუსი, რომელმაც 180° შეცვალა თავისი პოზიცია და თუ ადრე იძახდა Танки на Тбилиси, ახლა იძახის, საქართველო უნდა გავამთლიანოთო. მინდა მჯეროდეს, რომ მოკრძალებული წვლილი ამ პირადი ურთიერთობების ხარჯზე მეც შევიტანე“, – განაცხადა ვასაძემ Tv პირველის ეთერში.
ინფორმაციისთვის, 26 მაისს ბიზნესმენი ვასაძე დუგინს შეხვდა.
კომენტარები