„დაახლოებით იგივე ეწერა 8 მარტის ყბადაღებულ შეთანხმებაში, “პრეზიდენტის განსაკუთრებულ როლზე” და ყველამ ვნახეთ რაში გამოიხატა ეს, როდესაც პრეზიდენტმა ქვეყანა ფაქტის წინაშე დააყენა,”- წერს ანალიტიკოსი ზაალ ანჯაფარიძე სოციალურ ქსელში.
ასე ანალიტიკოსი ევროპარლამენტარი ვიოლა ფონ კრამონის განცხადებას ეხმაურება იმის თაობაზე, რომ საქართველოს პრეზიდენტის როლი მომდევნო კვირებში შესაძლოა, გადამწყვეტი იყოს.
„ჩნდება საფუძვლიანი ეჭვი, რომ სალომე ზურაბიშვილი ამჯერადაც ასე მოიქცევა და სააკაშვილთან მიმართებაში, ასევე მომხდარი ფაქტის წინაშე დაგვაყენებს და ამას ევროატლანტიკური რიტორიკით გაამართლებს.
მან დროზე უნდა შეიტანოს სიცხადე მის ირგვლივ დაგროვილ კითხვებთან და ეჭვებთან დაკავშირებით, მერე უკვე გვიანი იქნება!“- წერს ზაალ ანჯაფარიძე.
ცნობისთვის, პრეზიდენტმა კოალიციური მმართველობის აუცილებლობაზე ფრანგული გამომცემლობა „კვირის ჟურნალისთვის“ მიცემულ ინტერვიუში ისაუბრა.„9 წლის განმავლობაში სახელისუფლებო უმრავლესობის მიერ დაკომპლექტებული მთავრობის შემდეგ, ნათელია, რომ კოალიციური მთავრობა აუცილებელია,“ – განაცხადა სალომე ზურაბიშვილმა.
საქართველოს პრეზიდენტის განცხადებას კოალიციურ მთავრობასთან დაკავშირებით, ვიოლა ფონ კრამონი „ტვიტერში“ გამოეხმაურა.„მნიშვნელოვანი განცხადება საქართველოს პრეზიდენტისგან. მისი როლი მომდევნო კვირებში შესაძლოა, გადამწყვეტი იყოს“, – წერს ევროპარლამენტარი.
კომენტარები