ჩინეთში სიკვდილით დასაჯეს კაცი, რომელმაც ყოფილი მეუღლე მოკლა

ჩინელი კაცი, რომელმაც ყოფილი მეუღლე ინტერნეტის პირდაპირ ეთერში ჩართვის დროს მოკლა, სიკვდილით დასაჯეს, – ამის შესახებ BBC წერს.

ქალი სახელად ლამუ ჩინეთში ცნობილი ვლოგერი იყო. ის ვიდეოებს TikTok-ის ჩინურ ვერსიაზე, აპლიკაცია Douyin-ზე აქვეყნებდა.

ქალი მეუღლეს 2020 წლის ივნისში დაშორდა. დაახლოებით სამი თვის შემდეგ, ყოფილმა მეუღლემ ქალი საკუთარი მამის სახლში სასტიკად მოკლა – მას ბენზინი გადაასხა და დაწვა. ქალმა სხეულის 90%-იანი დამწვრობა მიიღო და ორი კვირის შემდეგ გარდაიცვალა.

სასამართლომ დაადგინა, რომ კაცის დანაშაული იყო „უკიდურესად სასტიკი“, ხოლო მისი ქმედების საზოგადოებაზე გავლენა – „უკიდურესად ცუდი“.

ქალს ორი შვილი ჰყავდა. ის სუჩუანის პროვინციის ერთ-ერთ სოფელში ცხოვრობდა და საკუთარი ცხოვრების შესახებ ვიდეოებს აქვეყნებდა.