უკრაინაში მიმდინარე პოლიტიკურ პროცესებს ეხმაურება და პარალელებს 2008 წელს, საქართველოში განვითარებულ მოვლენებთან ავლებს პოლიტოლოგი ლევან ლორთქიფანიძე. ლორთქიფანიძე ამბობს, რომ უკრაინისა და საქართველოს ამბები ერთმანეთს „გაჭრილი ვაშლივით“ ჰგავს და განსხვავება მხოლოდ ლიდერთა მიერ მიღებულ გადაწყვეტილებებში უნდა ვეძებოთ.
„უკრაინის პარტიულ სისტემას კარგად ვიცნობ, ბევრი რამ წამიკითხავს უკრაინაში პარტიების ფორმირების, მათი მუშაობის წესების შესახებ… ჩემში არანაირ სიმპატიასა და ნდობას არ იწვევენ უკრაინელი პოლიტიკოსები და მათ უკან მდგარი ოლიგარქები. თუმცა, სასიამოვნოდ გაკვირვებული ვარ უმძიმეს ვითარებაში პრეზიდენტ ზელენსკის მოქმედებებით. გაჭრილი ვაშლივით ჰგვანან ერთმანეთს უკრაინისა და საქართველოს ტრაგედიები. რუსული აგრესია, სამხედრო მუქარა, “დაჩაგრული ხალხების გენოციდში” დადანაშაულება, წარმოუდგენლად მცირე პროვინციებისა და პატარა დასახლებების დამოუკიდებელ სახელმწიფოებად ცნობა ორივე ქვეყანამ გამოვიარეთ. მთავარი განსხვავებები ლიდერთა შორის უნდა ვეძიოთ,“ – წერს ლევან ლორთქიფანიძე და რამდენიმე კონკრეტულ დეტალზე ამახვილებს ყურადღებას.
„მიუხედავად უამრავი პროვოკაციისა, ზელენსკის რუსებისთვის ჯერჯერობით არ მიუცია საბაბი ფართომასშტაბიანი ომის დაწყებისათვის. ზელენსკის ვერავინ დააბრალებს, რომ “მძინარე დონეცკი დაბომბა”, ზელენსკი დროშებიანი და ტრიბუნებიანი ტრაილერებით არ დაძრულა ლუგანსკისკენ. ზელენსკის არც ერთ მინისტრს არ უთქვამს, რომ რუსეთი არაფერ შუაშია და დონბასში განვითარებული მოვლენები “დენის პუშილინის თვითშემოქმედებაა” და ა.შ. ყოველდღე ვუყურებ და ვუსმენ ანდრეი მელნიკს, უკრაინის ელჩს გერმანიაში, რომელიც განსაკუთრებული მონდომებითა და პროფესიონალიზმით იცავს თავისი ქვეყნის ინტერესებს არამხოლოდ ოფიციალურ სტრუქტურებში, არამედ საჯარო დისკუსიების მიმდინარეობის დროს… მისი რანგის ელჩი რომ გვყოლოდა რომელიმე წამყვან ქვეყანაში, უკეთ წარმოვაჩენდით ჩვენს პრობლემას!“- წერს პოლიტოლოგი.
მისი თქმით, უკრაინის ხელისუფლება კარგად იცნობს 2008 წლის საქართველოს გამოცდილებას და ცდილობს თავიდან აირიდოს მსგავსი შეცდომები.
„მოკლედ, როგორც ჩანს, უკრაინის დღევანდელი ხელისუფლება კარგად იცნობს 2008 წლის გამოცდილებას და ცდილობს თავიდან აირიდოს ის სამარცხვინო შეცდომები, რომლებიც მაშინ ჩვენ დავუშვით სასტიკ მტერთან პირისპირ დარჩენისას. იმედია, უკრაინა შეძლებს იმპერიის პროვოკაციებისგან თავის არიდებას. სასიხარულოა, რომ მთელი მსოფლიო უპირობოდ უჭერს მხარს უკრაინის სუვერენიტეტსა და ტერიტორიულ მთლიანობას,“- წერს ლევან ლორთქიფანიძე.
კომენტარები