გურჯაანის მუნიციპალიტეტში, სოფელ ვეჯინში მომხდარი მკვლელობის ახალი დეტალები – ადგილობრივების ინფორმაციით, რამდენიმე თვეა პენსიონერ მეზობელს და ჯანიაშვილებს კონფლიქტი მიწის ნაკვეთზე ჰქონდათ. შემთხვევამდე მათ შორის შელაპარაკება სწორედ ამ მიზეზით მოხდა.
“კურიერი” მოკლული 35 წლის მამაკაცის მამას ესაუბრა. დავით ჯანიაშვილი ვარაუდობს, რომ მათთან კონფლიქტში მყოფ მეზობელს დანაშაული წინასწარ ჰქონდა განზრახული.
“წინდაწინ იყვნენ მომზადებულები, იმიტომ, რომ ჩასაფრებით არის ნასროლი. მე ცოტა მოშორებით ვიყავი თოფის ხმა რომ გავიგე. ჩემი შვილი, საცოდავი, გარკვეული მეტრაჟით გამოიქცა. სანამ შევხვდებოდი, დავარდნილი იყო, გონი აღარ ჰქონდა, ძლივს სუნთქავდა…
მისასვლელი იყო და [მკვლელობაში ბრალდებულმა] ადრე “სეტკით” გადაგვიკეტა, იჩემებდა ჩემია, ჩემიაო. მაგის არ იყო და ვუთხარით… თვითონ მკვლელის შვილმაც, აქ მე მგონი ვიღაც უნდა მოკვდესო. მეთქი რას ამბობ, აბა დაუკვირდი. კარგი, კარგიო და ამით დამთავრდა…” – ამბობს დავით ჯანიაშვილი.
მომხდართან დაკავშირებით მედიასთან ადგილობრივებიც საუბრობენ.
“ტერიტორიაზე შესასვლელ კართან იდგა თოფით. თოფი დატენილი ჰქონდა თუ ცარიელი იყო არავინ არ ვიცით. ალბათ ვფიქრობ მზად იყო თავდასაცავად,” – აცხადებს ერთ-ერთი მეზობელი.
ცნობისთვის – 89 წლის კაცმა 35 წლის მეზობელს სანადირო თოფიდან ესროლა. ბექა ჯანიაშვილი ადგილზე დაიღუპა. შემთხვევა გურჯაანის მუნიციპალიტეტის სოფელ ვეჯინში მოხდა. სავარაუდო დამნაშავე, ხანდაზმული მამაკაცი, დაკავებულია. მიმდინარეობს ძიება.
კომენტარები