2024 წლის დეკემბერში ბაქო–გროზნოს ავიარეისის ჩამოგდების გამო აზერბაიჯანი რუსეთს საერთაშორისო სასამართლოში უჩივის. ამის შესახებ პრეზიდენტმა ილჰამ ალიევმა შუშაში გამართულ მესამე მედია ფორუმზე განაცხადა.
პრეზიდენტის თქმით, 2024 წლის 25 დეკემბერს ყაზახეთის ცაში ჩამოვარდა ავიაკომპანია AZAL-ის სამოქალაქო თვითმფრინავი, რომელსაც ბაქოდან გროზნოში მიჰყავდა მგზავრები. ტრაგედიამ 38 ადამიანის სიცოცხლე შეიწირა. წინასწარი მონაცემებით, თვითმფრინავი რუსული რაკეტის მოხვედრის შედეგად განადგურდა.
„სამწუხაროდ, რუსული მხარისგან არ მიგვიღია არც ახსნა, არც პასუხი. უკვე 7 თვე გავიდა. ჩვენთვის ყველაფერი ნათელია. გვაქვს მტკიცებულებები, ვიცით რა მოხდა და ვიცით, რომ რუსეთმაც ზუსტად იცის სიმართლე“, – განაცხადა ალიევმა.
მისი თქმით, აზერბაიჯანის მოთხოვნა სამართლიანია:
– რუსეთმა აღიაროს პასუხისმგებლობა,
– დასაჯოს დამნაშავეები,
– და გადაუხადოს კომპენსაცია როგორც დაღუპულთა ოჯახებს და დაშავებულებს, ასევე ავიაკომპანიას.
ეს ინციდენტი არ იქნება დავიწყებული. ვამზადებთ დოკუმენტაციას და საქმეს გადავცემთ საერთაშორისო მართლმსაჯულებას. ვიცით, რომ ეს შეიძლება წლები გაგრძელდეს – მალაიზიური „ბოინგის“ საქმემ, რომელიც 2014 წელს რუსულმა რაკეტამ ჩამოაგდო უკრაინაში, ათ წელზე მეტი გასტანა. მაგრამ ჩვენც დაველოდებით – სამართლიანობა აუცილებლად უნდა იზეიმებს, – განაცხადა ალიევმა.
ღონისძიებაზე ალიევმა ასევე უპასუხა კითხვას, თუ რას ურჩევს უკრაინელ ხალხს:
როცა რამდენიმე წლის წინ უკრაინის წარმომადგენელმა მსგავსი კითხვა დამისვა, მაშინაც იგივე ვუთხარი და ახლაც იგივე ვიტყვი:
არასდროს დათანხმდეთ ოკუპაციას. არასდროს დანებდეთ და არ შეეგუოთ თქვენი ტერიტორიული მთლიანობის დარღვევას.
ეს არის მთავარი გზავნილი, რომელიც უკრაინელების მისწრაფებებსაც სრულად შეესაბამება, – თქვა აზერბაიჯანის პრეზიდენტმა.
კომენტარები