ბუტა რობაქიძის დედის ია მეტრეველის განცხადებით, მისი შვილის მკვლელობის საქმეზე ყოფილმა გენერალურმა პროკურორმა, ზურაბ ადეიშვილმა პასუხი უნდა აგოს.
როგორც მან მედიაცენტრ „მთავარში“ გამართულ პრესკონფერენციაზე აღნიშნა, მიესალმება თბილისის საქალაქო სასამართლოს გადაწყვეტილებას, რომლის მიხედვითაც ბუტა რობაქიძის მკვლელობის საქმეზე ყოფილ შინაგან საქმეთა მინისტრს, ირაკლი ოქრუაშვილს 7 წლით თავისუფლების აღკვეთა მიესაჯა.
„მისასალმებელია, სჯობს გვიან, ვიდრე არასდროს. ამდენი ხანი ველოდებოდი ამ ფაქტს. ეს ადრე უნდა მომხდარიყო, მაგრამ რატომღაც დიდი დრო დასჭირდა ამ ყველაფერს. ცოტა არ იყოს, გაკვირვებული ვარ ადეიშვილის გამართლებასთან დაკავშირებით. ვფიქრობ, ადეიშვილს უფრო დიდი წვლილი მიუძღვის ამ უბედურებაში. ასევე, მას აუცილებლად პასუხი უნდა მოეთხოვოს. რატომ მოხდა ადეიშვილის გამართლება ჩემთვის გაუგებარია იმიტომ, რომ ადეიშვილი მაშინ მთავარი პროკურორი იყო, ის განაგებდა ამ პროცესებს, ყველაფრის საქმის კურსში იყო. ჩვენ ძალიან კარგად ვიცით, რასაც წარმოადგენდა ადეიშვილი. მის გარეშე რომ არაფერი მოხდებოდა ქვეყანაში, მიშას ბრძანებებს პირადად ის ასრულებდა, იდეოლოგიც და შემოქმედიც ადეიშვილი იყო, მანაც აუცილებლად უნდა აგოს პასუხი. დიდი მოლოდინით ველოდები იმას, რომ პროკურატურა ასაჩივრებს და შემდგომ სასამართლოში აუცილებლად უნდა მოხდეს ასევე მისთვის ბრალის წაყენება “,- განაცხადა ია მეტრეველმა.
მისი თქმით, იბრძვის იმისთვის, რომ სამართალი ყველასთვის აღდგეს.
„ახლა მაინც მაქვს იმედი, რომ პროკურატურა ბოლომდე მიიყვანს ამ საქმეს. მოსამართლეებმაც მინდა ჩემი თხოვნა და მოთხოვნაც ყურად მიიღონ, შესაფერისი ზომები მიიღონ და ადეიშვილსაც მიესაჯოს ის, რაც ეკუთვნის. ამდენი წლის მერე სამართალი მაინც უნდა მივიდეს ბოლომდე“,- განაცხადა ია მეტრეველმა.
თბილისის საქალაქო სასამართლომ ბუტა რობაქიძის მკვლელობის საქმეზე ყოფილ შინაგან საქმეთა მინისტრს, ირაკლი ოქრუაშვილს 7 წლით თავისუფლების აღკვეთა მიუსაჯა, ამავე საქმეზე ბრალდებული ყოფილი გენერალური პროკურორი ზურაბ ადეიშვილი კი გაამართლა.
კომენტარები