მე-11 დღეა მეხანძრე-მაშველები ბორჯომის მუნიციპალიტეტში ხანძარს ებრძვიან. მეხანძრე-მაშველებთან ერთად, კვლავ უწყვეტ რეჟიმში მუშაობენ შინაგან საქმეთა სამინისტროს სხვადასხვა დეპარტამენტის, თავდაცვის სამინისტროს, რეგიონული განვითარებისა და ინფრასტრუქტურის სამინისტროს, ასევე, გარემოს დაცვისა და სოფლის მეურნეობის სამინისტროს შესაბამისი სამსახურების თანამშრომლები.
სოფელ ქვაბისხევის მიმდებარე ტერიტორიაზე, რომელიც გუშინ, დღის მეორე ნახევარში ყველაზე ცხელი წერტილი იყო, დღეს დაკვამლიანება ძალიან მცირეა. ამჟამად შეინიშნება მხოლოდ მცირე კერები, რომლის სალიკვიდაციო სამუშაოები ახლა უწყვეტ რეჟიმში მიმდინარეობს. სამუშაოს ართულებს რელიეფი, ვინაიდან არსებულ კერებთან მისვლას, ავიაციის გარდა, სჭირდება ხელით დამუშავება. ახლა ყველაფერი დამოკიდებულია ამინდზე, და შესაძლებელია, რომ ბორჯომის ხეობაში ხანძრის სრულად ლიკვიდირება დღის ბოლომდე მოხერხდეს.
ბორჯომის მუნიციპალიტეტის სოფელ ქვაბისხევის მიმდებარე ტყეში რამდენიმე ხანძრის კერა 21 აგვისტოს, დილიდან წარმოიქმნა. სამუშაოებს ძლიერი ქარი და რთული, კლდოვანი რელიეფი ართულებდა.
ბორჯომში, ზორეთის ტერიტორიაზე ტყის მასივში ხანძარი 19 აგვისტოს გაჩნდა და მეხანძრე-მაშვლებმა კერის ლიკვიდირება მოახერხეს, თუმცა ძლიერმა ქარმა ცეცხლის ძველი კერები გააღვივა და შედეგად, ახალი კერებიც წარმოიქმნა.
პრემიერ-მინისტრის ბრძანებით, ბორჯომში ბუნებრივი კატასტროფის თავიდან აცილებისა და ხანძარსაწინააღმდეგო მოქმედებების ეფექტურად განხორციელების მიზნით, პროცესში თავდაცვის ძალები ჩაერთნენ.
კომენტარები