როგორც პარლამენტის წევრს, რომ ვთვლიდე, ვზივარ პარლამენტში ოკუპანტი ქვეყნის მიერ დანიშნულ მმართველ ძალასთან ერთად, მაშინ ჩემი ადგილი იქ არ იქნებოდა, – ამის შესახებ პარტია „მოქალაქეების“ ერთ-ერთმა ლიდერმა, პარლამენტის ვიცე-სპიკერმა ლევან იოსელიანმა გადაცემაში „იმედი LIVE“ განაცხადა.
მისი თქმით, უკრაინაში კონფლიქტის გამო რუსეთისთვის დაწესებული სანქციები აუცილებლად გამოიღებს შედეგს, რადგან „სფერო არ დარჩა, სადაც სანქცია არ მოქმედებდეს“.
„გამორიცხულია, რომ ამან შედეგი არ გამოიღოს და საბოლოოდ, ეს ძალიან ცუდად არ დასრულდეს რუსეთისთვის. ეს მხოლოდ დროის ამბავია, ჩემი აზრით. უკრაინელ ხალხს მართებს მხოლოდ გამძლეობა და ამ ბრძოლას ის აუცილებლად მოიგებს. მნიშვნელოვანია, რომ ჩვენ, ქართველები მათ გვერდით ვიყოთ. ისინი ამას გრძნობენ. თქვენ შვედეთი ახსენეთ, მაგრამ არა მგონია, უკრაინელებს შვედების გვერდი-გვერდ ოდესმე ებრძოლოთ, მაგრამ ეს ხალხი ჩვენს გვერდიგვერდ იბრძოდა აფხაზეთის ომში. ეს ხალხი გვეხმარებოდა 2008 წელს. ჩვენ მათ მიმართ განსაკუთრებული ორალური, ადამიანური და ყველანაირი ვალდებულება გვაქვს“, – განაცხადა იოსელიანმა.
მისი თქმით, პოლიტიკური სპექტრი საქართველოში განსხვავებულია და მათი ქცევაც განსხვავებულია, მაგრამ საზოგადოება უკრაინის საკითხთან დაკავშირებით სწორად მოიქცა.
„ჩვენ ვნახეთ ახალგაზრდა თაობა, რომელიც ქუჩაში გამოვიდა და მხარი დაუჭირა უკრაინას. მთელი ამ დღეების განმავლობაში გამოხატა ეს უპრეცედენტო სოლიდარობა. შესაძლოა, ვიღაცებს სურთ, ეს საკუთარ პოლიტიკურ ინტერესებს მოარგონ, რაღაც ქნან. კარგია, რომ აქციები, რომელიც რუსთაველზე ტარდებოდა, საბოლოო ჯამში, მანიფესტაციაში არ გადაიზარდა. ბევრს კბილები უკაწკაწებდა, ეს ყოველივე საკუთარ პოლიტიკურ ინტერესებისთვის მოერგო“, – დასძინა იოსელიანმა.
კომენტარები