“ბავშვი ცოლი არ არის” – დღეს, 15 ოქტომბერს, 20:00 საათზე, პარლამენტთან მდუმარე აქცია გაიმართება. ის “რეპროდუქციული განათლების ჰაბის” და “ნაამბობის” მიერაა ორგანიზებული.
ორგანიზატორები ხელისუფლების წარმომადგენლებსა და სამართალდამცავ ორგანოებს მოუწოდებენ, რომ მოწყვლადი ჯგუფები ძალადობისგან დაიცვან.
“ჩვენ, მოქალაქეები და არასამთავრობო ორგანიზაციები, გამოვხატავთ სოლიდარობას არამხოლოდ გარდაცვლილი მოზარდის მიმართ, არამედ დახმარებასა და მხარდაჭერას ვთავაზობთ იმ ბავშვებსა თუ ქალებს, რომლებიც ახლაც, ამ წამსაც, განიცდიან ნებისმიერი სახის ძალადობას
მიუხედავად იმისა, რომ პედოფილია, ნაადრევი ქორწინება, თავისუფლების უკანონო აღკვეთა და სექსუალური ძალადობა დანაშაულია, საზოგადოების გარკვეულ წრეებში ამაზე არ საუბრობენ, მსხვერპლები დუმილს ამჯობინებენ, კანონის აღსრულება კი სათანადოდ არ ხდება
სწორედ ამიტომ, პარლამენტთან, მდუმარე აქციაზე, ორგანიზატორები და აქციის მონაწილეები, მივიტანთ თოჯინებს, სანთლებსა და ყვავილებს და სიმბოლურად ვეცდებით, რომ უფრო თვალშისაცემი გავხადოთ პედოფილიის დუმილით წახალისება. ამასთანავე, მოვუწოდოთ ხელისუფლების წარმომადგენლებსა თუ სამართალდამცავ ორგანოებს, რომ დაიცვან მოწყვლადი ჯგუფები ძალადობისაგან,” – ნათქვამია ორგანიზატორების განცხადებაში.
შეგახსენებთ, რომ საგარეჯოს სოფელ ლამბალოში, 14 წლის აითაჯ შახმაროვა 6 ოქტომბერს მოკლეს. მოკლული არასრულწლოვანი წარმოშობით დმანისის სოფელ მამიშლარიდან იყო. “ქმარი” პოლიციამ ოთხდღიანი ძებნის შემდეგ დააკავა.
დაკავებულები არიან მოკლული გოგონას დედა და ბიძაც. გამოძიება მათ ქორწინების იძულებასა და დანაშაულის შეუტყობინებლობას ედავება. ორივე მათგანი წინასწარ პატიმრობაშია.
14 წლის აითაჯ შახმაროვას საქმეზე, პოლიციამ კიდევ 2 პირი დააკავა – გოგონას მკვლელობაში ბრალდებულის ბიძა და ბიძაშვილი.
კომენტარები