ბაჩიაშვილზე თავდასხმა იგეგმება – გიორგი ჩიკვაიძე

პატიმრობაში მყოფი გიორგი ჩიკვაიძე საგანგებო განცხადებას ავრცელებს და აღნიშნავს, რომ მისი ინფორმაციით, გიორგი ბაჩიაშვილზე თავდასხმაა დაგეგმილი.

ჩიკვაიძე პენიტენციურ სამსახურს მიმართავს, გაატაროს პრევენციული ზომები:

მაქსვს ინფორმაცია, რომ გიორგი ბაჩიაშვილზე იგეგმება უახლოეს დღეებში და მოვუწოდებ პენიტენციურ სამსახურს, მოახდინოს აღნიშნულის პრევენცია”- წერს ბიზნესმენი. 

ცნობისთვის, პატიმრობაში მყოფი გიორგი ბაჩიაშვილის ცემის შესახებ ინფორმაცია 14 ივლისს გავრცელდა. წერილი გაავრცელა თავად ბაჩიაშვილმაც, სადაც წერდა, რომ 11 ივლისს ციხეში თავს დაესხნენ და სასტიკად სცემეს. ბაჩიაშვილის თანახმად, თავდასხმამდე 3 დღით ადრე 8 ივლისს, დაწესებულების ხელმძღვანელმა დავით გოგობერიშვილმა ის ცალკე დაიბარა და „მეგობრულად ურჩია“, ბიძინა ივანიშვილს მისი საბანკო ანგარიშები, კრიპტობირჟების ბრუნვები და სხვა ფინანსური მონაცემები მიეწოდებინა.

“ნოდარ მელაძის შაბათმა” გიორგი ბაჩიაშვილზე თავდამსხმელის ვინაობა მალევე დაადგინა. პირი, ვინც 40 წლის ბიზნესმენს საკანში თავს დაესხა და სასტიკად გაუსწორდა,  28 წლის კახი მეტრეველია. ირკვევა, რომ კაცი, რომელიც ივანიშვილის მილიარდების ყოფილ მმართველს გაუსწორდა, უკვე 10 წელია სასჯელს, სხვადასხვა დანაშაულისთვის იხდის. ის, მთელი ამ დროის მანძილზე, ქსნის ციხეში ჰყავდათ მოთავსებული, თუმცა ვადის ამოწურვამდე ერთი თვით ადრე მოულოდნელად ციხე შეუცვალეს.