საპატრიარქოს განცხადებით, თერჯოლაში გარდაცვლილი 11 წლის ბავშვისთვის წესის აგების საკითხზე ეპარქიამ უნდა იმსჯელოს.
“საპატრიარქოსთვის არ მოუმართავს ოჯახს და ეს ლოგიკურიც არის. ჯერ ამაზე თავად ეპარქიის ხელმძღვანელმა უნდა იმსჯელოს. მე როგორც ვნახე ინტერვიუში, მეუფემ დაავალა მოძღვარს, რომ გარემოებები შეისწავლოს. ზოგადად ასე ხდება ხოლმე, გარემოებებს სჭირდება გარკვეული ანალიზი, თუ რა მოხდა იქ.
11 წლის ბავშვი, რთულია წარმოვიდგინოთ, რომ სრულად აცნობიერებდა გარემოებებს, რომელშიც ის მოხვდა. ყველა შემთხვევაში სამსჯელო საკითხია”, – აცხადებს საპატრიარქოს პრესსპიკერი დეკანოზი ანდრია ჯაღმაიძე “ფორმულასთან”.
თერჯოლა-ტყიბულის ეპარქიის მეუფე გიორგი შალამბერიძე კი აცხადებს, რომ თუ მოზარდმა თავი მოიკლა, მას წესს ვერ აუგებენ და ვერც გამონაკლისს დაუშვებენ.
“არ ვიცი ამის შესახებ, ჩემთვის არ მოუმართავთ. აუცილებლად დავავალებ მამაოს ამ საკითხის გამოკვლევას, ვიმსჯელებთ, თუ ბავშვმა თავი მოიკლა, წესს ვერ ავუგებთ გამორიცხულია, ეს ღვთის გმობაა. არ გვაქს უფლება, ვერც გამონაკლისს დავუშვებთ, ღმერთს გამონაკლისები არ აქვს, ზუსტად მოქმედებს. ვერც მოზარდის შემთხვევაში ექნება.
11 წლის ბავშვი გაუაზრებელია? ჩვენ შეგვიძლია ცოდვები მივუტევოთ, სხვა მხრივ დაუშვებელია. გამონაკლისს ვუშვებთ ავადმყოფობის შემთხვევაში, თუ ექიმის ცნობა იქნება, სხვა მხრივ არაა,” – განაცხადა მეუფე გიორგიმ “რუსთავი 2” – თან.
კომენტარები