ახალციხის მიტროპოლიტმა, მეუფე ნიკოლოზმა “ჯორჯიან თაიმსის” ეთერში ვაქცინაციაზე საუბრისას განაცხადა, რომ სასურველია, აცრილმა და აუცრელმა ადამიანებმა მშვიდობიანად თანაცხოვრება და ერთმანეთის პატივისცემა შეძლო.
როგორც მეუფემ მაკა რაზმაძის საავტორო გადაცემაში, “ჩაი” სტუმრობისას განაცხადა, ზიარებისთვის არ აქვს არსებითი მნიშვნელობა ადამიანი ვაქცინირებულია თუ არა. მისივე თქმით, შესაძლებელია, რომ აცრის მოტივაცია სამ ნაწილად დაიყოს.
“ჩვენ ძალიან მკაფიოდ გამოვთქვით ჩვენი აზრი. ჩვენ ვთქვით, რომ აცრა, აუცრელობა, ეს ავადმყოფობა სრულებით არ არის რელიგიური შინაარსის მატარებელი. აცრას და აუცრელობას არ შეიძლება ჰქონდეს რელიგიური მოტივაცია ჰქონდეს. აცრილია თუ არა ადამიანი, ამას არავითარი მნიშვნელობა არ აქვს ზიარებისათვის.
ვისაც უნდა აიცრას, ვისაც არ უნდა, ნუ აიცრება. ყველას თავისი დამოკიდებულება აქვს. აცრის მოტივაცია სამ ნაწილად შეიძლება დაიყოს.
პირველი – რელიგიური მოტივაცია, ეშმაკის არის თუ არა და არავითარი რელიგიური მოტივაცია აცრას არ გააჩნია.
მეორე – ეს არის სამედიცინო მოტივაცია. ყველა ადამიანმა თავის პირად ექიმთან უნდა გაარკვიოს რამდენად საჭიროა მისთვის აცრა, თუ არ არის საჭირო, შეიძლება თუ არ შეიძლება.
მესამე – სოციალური ფონი. რაღაც ტიპის დაწესებულებებია, ქვეყნებია, სადაც ვერ მოხვდები თუ აცრილი არ ხარ. ჩვენ თუ ვცხოვრობთ დემოკრატიულ საზოგადოებაში, კარგად უნდა გავარკვიოთ, რისი უფლება გვაქვს და რისი არა, რა გვინდა და რა არ გვინდა, ასევე. ერთმანეთის სურვილებს ანგარიში უნდა გავუწიოთ. თუ მე არ მინდა, რომ ავიცრა, ანგარიში უნდა გამიწიოთ და მეც პატივი უნდა ვცე თქვენს გადაწყვეტილებას თუ გინდათ, რომ აიცრათ.
ვფიქრობ, აცრილებმაც და აუცრელებმაც ერთმანეთს პატივი უნდა ვცეთ. არ შეიძლება ადამიანს რამე დააძალო, არც აცრა და არც აუცრელობა. ტოლერანტულები უნდა ვიყოთ ერთმანეთის მიმართ. ვთქვათ, თუ მე არ ვიცრები, არ ვარ ბნელი და თუ შენ იცრები, არც შენ ხარ ბნელი. ორივე აზრი მომისმენია, ძალიან აგრესიული და ყველას მოვუწოდებ, რომ მშვიდობიანი თანაცხოვრება გვქონდეს“, – განაცხადა მეუფე ნიკოლოზმა.
კომენტარები