“აცხადებენ, რომ თურმე, ეს დეტალები არის საიდუმლო…” – რას წერს სოსო გოგაშვილი?

სუს-ის უფროსის ყოფილი პირველი მოადგილე, სოსო გოგაშვილი, სოციალურ ქსელში, წერს:

“ხალხის მიერ არჩეული პოლიტიკოსები, რომლებმაც უნდა მართონ ხალხის ქვეყანა და ჩააბარონ ანგარიში ხალხს, შედიან ერთმანეთთან ხელოვნურ კონფლიქტში, ამით საფრთხეს უქმნიან მათი ამომრჩევლის- ხალხის კეთილდღეობას და ქვეყნის მომავალს.

შემდეგ ისინი მიუხედავად ხალხის მოწოდებისა, არ რიგდებიან და ქვეყანა შეჰყავთ ღრმა მრავალმხრივ კრიზისში. პრობლემა ხვდება ქვეყნის, ანუ ხალხის უცხოელი პარტნიორების და გულშემატკივრების თვალთახედვის არეში, ისინი ერთვებიან შერიგება-მორიგების პროცესში, საუბრობენ სახელმწიფოებრივ საკითხებზე, რომელიც პირდაპირ ეხება ხალხს, რომელმაც აირჩია ეს პოლიტიკოსები და ხალხს ვის ინტერესებსაც იცავენ უცხოელები, ესე გამოდის…

გამოდიან შემდეგ ეს ხალხის არჩეული პოლიტიკოსები და აცხადებენ, რომ მოლაპარაკების დეტალები, რომელიც ეხება ქვეყნის და შესაბამისად ხალხის მომავალს თურმე არის საიდუმლო, ან ნაწილობრივ საიდუმლო და ხალხმა არ უნდა იცოდეს ის, რაც მათ ელოდება ხვალ.

2 მილიონი ხმაა ეს და არა 2 მილიონი სრულყოფილი მოქალაქე?

თუ ასე თვლით მაშინ არასახალხო ორგანიზაციები ხართ.”