ზუგდიდის მერობის კანდიდატი ანზორ მელია საქართველოს მესამე პრეზიდენტის ჯანმრთელობის გაუარესების საკითხს ეხმაურება და აცხადებს, რომ უახლოესი საათების განმავლობაში თუკი ექიმების კონსილიუმი არ შედგა და მას შესაბამისი მკურნალობა არ დაენიშნა, შესაძლოა რამდენიმე დღის განმავლობაში ფატალური შედეგით დასრულდეს სააკაშვილის შიმშილობა. მისი თქმით, ორგანიზმში აციდოზი განვითარებულია, რაც პერმანენტულ კონტროლს საჭიროებს.
“შემაშფოთებელი ინფორმაცია მივიღეთ ბატონი ყიფშიძისაგან. განგაშის ზარებს უნდა ჩამოვკრავდეთ ახლა. აქ ერთი წუთი მოთმინებაც არ შეიძლება იმიტომ, რომ ეს დაავადებები, ფონური დაავადებაა, მაგრამ მერვე თუ მეცხე დღეა შიმშილობის და აციდოზი უკვე განვითარებულია ორგანიზმში. მაგას უნდა კონტროლი, აციდოზს, დილას და საღამოს და გადასხმები…
მაგრამ არც ყიფშიძის და არც მელიას დონეზე ეს არ უნდა გადაწყდეს. აქ უნდა შედგეს კონსილიუმი. აქ ყველა ექიმი უნდა გავერთიანდეთ, ყველა ადამიანი უნდა გავერთიანდეთ, რომ კაცი ვიხსნათ სიკვდილისაგან. მე მივმართავ ჯანმრთელობის მინისტრს, ქალბატონ ეკატერინე ტიკარაძეს, რომ სასწრაფოდ გააკეთოს ორგანიზაცია, რომ დღესვე კონსილიუმი შედგეს და დაინიშნოს საქართველოს მესამე პრეზიდენტს მკურნალობა, თორემ ხვალ ზეგ უკვე შეიძლება გვიანი იყოს. მე დარწმუნებული ვარ, რომ ქალბატონი მინისტრი ამას გააკეთებს“, – განაცხადა ანზორ მელიამ.
კომენტარები