აშშ-მა და იაპონიამ სავაჭრო და იშვიათი წიაღისეულის შეთანხმება გააფორმეს

ამერიკის შეერთებულმა შტატებმა და იაპონიამ იშვიათი მეტალების შესახებ გარიგება დადეს. დოკუმენტს ხელი ორი ქვეყნის ლიდერებმა, დონალდ ტრამპმა და სანაე ტაკაიჩიმ დღეს დილით მოაწერეს. როგორც თეთრი სახლის მიერ გამოქვეყნებული ინფორმაციით ირკვევა, გარიგება 14 ძირითადი პუნქტისგან შედგება.

უპირველეს ყოვლისა, შეთანხმება იშვიათი მეტალების სფეროში თანამშრომლობის გაღრმავებას, რესურსების გაცვლის გააქტიურებას და ერთმანეთის მიმართ ისეთი სავაჭრო პოლიტიკის გატარებას გულისხმობს, რომელიც ორივე ქვეყნისთვის სასიცოცხლო მნიშვნელობის მინერალებს მეტად ხელმისაწვდომს გახდის.

ხელმომწერები ასევე თანხმდებიან, რომ იშვიათი მეტალების მოპოვებისა თუ დამუშავების პროცესში თანამშრომლობას გააღრმავებენ და როგორც სახელმწიფო, ისე კერძო ინვესტიციებს განახორციელებენ ერთმანეთის პროექტებში. დოკუმენტში განმარტებულია, რომ ხელშესახები შედეგი ხელმოწერის გაფორმებიდან 6 თვის ვადაში უნდა დაიდოს.

გარიგების ნაწილია საინვესტიციო მინისტერიალის გამართვა დღეიდან 180 დღის შუალედში, რათა მხარეებმა მეტი მსხვილი ინვესტორის მოძიება და დაინტერესება შეძლონ.

კიდევ ერთი კომპონენტი გეოლოგიური რუკების განახლებაა, რაც ორივე ქვეყნის შემთხვევაში გულისხმობს არსებული მაღაროების შესაძლებლობების დაზუსტებას და საძიებო პროცესის დაწყებას ახალი საბადოების აღმოჩენისთვის. აღსანიშნავია, რომ დონალდ ტრამპმა მსგავსი ტიპის შეთანხმება გუშინ წინ მალაიზიასთან, გასულ კვირას კი ავსტრალიასთან გააფორმა.

იმ ფონზე, როცა ჩინეთი იშვიათი და ძვირფასი მეტალების საბადოების 65%, ხოლო მათი გადამუშავების ინდუსტრიის 91%-ს აკონტროლებს, ამერიკის შეერთებული შტატებისთვის კრიტიკული მნიშვნელობა შეიძინა შეთანხმების დადებამ ახლო მოკავშირეებთან. იაპონია და მალაიზია საბადოების დიდ მარაგს არ ფლობენ, თუმცა გარიგების მათთან დადებით ტრამპს ანტი-ჩინური ალიანსის შეკვრა სურს, რომელიც დროთა განმავლობაში, აზიური გიგანტისაგან დისტანცირებულად გააგრძელებს ვაჭრობას.

ამ კუთხით ტრამპმა გარიგების დადება ჯერ ვერ მოახერხა ვიეტნამთან. სიდიდით მე-6 ყველაზე დიდი მარაგების მქონე სახელმწიფოსთან, რომელიც ამერიკის ანტი-ჩინური პოლიტიკისთვის საკვანძო მოთამაშე გახდებოდა. ცნობისთვის, ეს სამხრეთ-აზიური სახელმწიფო 3.5 მილიონ ტონა მეტალების საბადოს ფლობს. ცნობისთვის, კონტინენტ-სახელმწიფო ავსტრალიის ტერიტორიაზე აღმოჩენილი და დადასტურებული ძვირფასი მეტალების მოცულობა 5.7 მილიონია.