შეერთებული შტატების, დიდი ბრიტანეთისა და საფრანგეთის მთავრობებმა რუსეთის თავდაცვის მინისტრის ბრალდებებზე ერთიანი განცხადება გაავრცელეს.
შოიგუს განცხადებებს, თითქოს უკრაინა საკუთარ ტერიტორიაზე “ბინძური ბომბის” გამოყენებისთვის ემზადება, სამივე ქვეყანა სიცრუეს უწოდებს.
“ჩვენ, საფრანგეთის, გაერთიანებული სამეფოს და შეერთებული შტატების საგარეო საქმეთა მინისტრები, კიდევ ერთხელ ვადასტურებთ ჩვენს ურყევ მხარდაჭერას უკრაინის სუვერენიტეტისა და ტერიტორიული მთლიანობის მიმართ რუსეთის მუდმივი აგრესიის ფონზე. ჩვენ ვაგრძელებთ უკრაინის მხარდაჭერას მისი ტერიტორიების დასაცავად იმდენ ხანს, რამდენ ხანსაც საჭიროა.
სერგეი შოიგუს თხოვნით, ჩვენი ქვეყნის თავდაცვის მინისტრები მას ტელეფონით ესაუბრნენ. ჩვენმა ქვეყნებმა ნათლად განაცხადეს, რომ ჩვენ ყველანი უარვყოფთ რუსეთის ცხადად ცრუ ბრალდებებს, თითქოს უკრაინა საკუთარ ტერიტორიაზე “ბინძური ბომბის” გამოსაყენებლად ემზადება. მსოფლიო დაინახავს ნებისმიერ მცდელობას, გამოიყენოს ეს ბრალდება ესკალაციის საბაბად. ჩვენ ასევე უარვყოფთ რუსეთის მხრიდან ესკალაციის ნებისმიერ საბაბს.
საგარეო საქმეთა მინისტრებმა ასევე განიხილეს მათი საერთო გადაწყვეტილება, გააგრძელონ უკრაინისა და უკრაინელი ხალხის მხარდაჭერა უსაფრთხოების, ეკონომიკური და ჰუმანიტარული დახმარებით პრეზიდენტ პუტინის სასტიკი აგრესიული ომის პირობებში”, – წერია განცხადებაში.
ცნობისთვის, 23 ოქტომბერს რუსეთის თავდაცვის მინისტრი, სერგეი შოიგუ დასავლეთის რამდენიმე ქვეყნის, საფრანგეთის, თურქეთის, დიდი ბრიტანეთისა და შეერთებული შტატების თავდაცვის მინისტრებს ესაუბრა. თითოეულ მათგანთან შოიგუმ უკრაინაში არსებული “სიტუაცია” განიხილა.
რუსეთის თავდავცის სამინისტრო აცხადებს, რომ შოიგუმ გამოხატა “შეშფოთება უკრაინის მიერ ბინძური ბომბის გამოყენებით შესაძლო პროვოკაციების გამო”. რუსეთს რაიმე მტკიცებულება არ წარუდგენია აღნიშნულის დასადასტურებლად.
კომენტარები