“ასეა, როცა კულტურის მინისტრი ქვეყანაში გამორჩეულად უკულტურო და უწიგნურია,” – ამის შესახებ “მთავარი არხის” გენერალური დირექტორი, ნიკა გვარამია სოციალურ ქსელში წერს.
როგორც გვარამია წერს, კულტურის სამინისტროს და თბილისის მერიის მიერ არქიტექტორზე, ალექსანდრე შიმკევიჩზე წიგნი გამოიცა, თუმცა წიგნს გარეკანზე თბილისის ოპერის შენობა დაახატეს. მისივე თქმით, ოპერის შენობა თბილისში ერთ-ერთი გრანდიოზული შენობაა, მაგრამ მას შიმკევიჩთან კავშირში არა აქვს.
“კულტურის სამინისტროს და თბილისის მერიის მიერ გამოიცა წიგნი დიდ არქიტექტორზე, თბილისის ულამაზესი შენობების ავტორზე, ალექსანდრე შიმკევიჩზე.
ყველაფერი კარგი.
მაგრამ არც აციეს, არც აცხელეს და გარეკანზე თბილისის ოპერის შენობა დაახატეს, რომელიც მგონი ერთადერთი გრანდიოზული შენობაა თბილისში, რომელიც შიმკევიჩთან კავშირში არაა. ვიქტორ შრეტერის არქიტექტურაა, განსხვავებით შიმკევიჩის უზენაესი სასამართლოსგან, ულამაზესი აბრეშუმის სახლისგან და მთლად ოპერის გვერდით მდგომი რუსთაველის თეატრისგან.
ასეა, როცა კულტურის მინისტრი ქვეყანაში გამორჩეულად უკულტურო და უწიგნურია და ძირითადად ექსტრადიციებით, ზიზღის ფრქვევით და მიკროფონების წართმევით ერთობა.
მერზე ლაპარაკიც არ ღირს. ეჭვი მაქვს, მილანში მრავალწლიანი ცხოვრების მიუხედავად, ლასკალაში ცალი ფეხიც არ შეუდგამს,” – წერს გვარამია.
კომენტარები