“არც ერთი წამით არ მტოვებდა იმის შეგრძნება, რომ ამ ბიჭების უკან მთელი საქართველო იდგა” – მურღულია ფეხბურთელებზე

ეს არის მხოლოდ პირველი ნაბიჯი – ჩვენ არ უნდა შეგვაცდინოს იმან, რომ ასეთ დიდ წარმატებას მივაღწიეთ, – ამის შესახებ ფილოლოგიის დოქტორმა, გია მურღულიამ გადაცემაში „იმედი LIVE“ განაცხადა, რომელმაც 26 მარტს მოპოვებული ისტორიული გამარჯვება შეაფასა.

მურღულიამ აღნიშნა, რომ ქართული საზოგადოება ფეხბურთელთა ამ წარმატებას 43 წელი ელოდა.

„არც ერთი წამით არ მტოვებდა იმის შეგრძნება, რომ ამ ბიჭების უკან მთელი საქართველო იდგა. იცით, რით იდგა? მთელი ისტორიით, თავისი ძალმოსილებით, ოცნებებით, თავისი დარდებითაც კი და ყველა აქეზებდა ამ ბიჭებს, რომ „აბა, თქვენ იცით!“. ბოლო პენალტი რომ გავიდა, ვულკანივით ამოხეთქა! ამ მომენტს რამდენჯერმე ვუყურე“, – განაცხადა მურღულიამ.

მისივე თქმით, ასეთი გამარჯვებები საზოგადოებაში მთავარს რასაც ბადებს, ეს იმედია.

„იცით, ეს რისი იმედია? რომ შენ შეგიძლია და მარტო ამ სფეროში კი არა, ყველგან შეგიძლია. ჩვენ მართლაც შეგვიძლია, რომ ყველა სფეროში წარმატებას მივაღწიოთ. ასეთი ერთიანობა, როდესაც მთელი ქვეყანა ამ ფეხბურთელებში არის განსხეულებული, ბადებს იმის იმედს, რომ ყველაფერი შეუძლიათ. ამნაირი განწყობის წინააღმდეგ ვერავინ წავა! ამის წინააღმდეგ ვერც მსოფლიო წავა! თუ ჩვენ ისეთები ვიქნებით, როგორებიც ეს ბიჭები იყვნენ მოედანზე, თუ ჩვენ მოვინდომებთ და სიტყვა სიყვარულს შევუწყვილებთ პასუხისმგებლობას, შრომისმოყვარეობას, მიზანსწრაფულობასა და ასე შემდეგ, ჩვენი გამჩერებელი არავინაა“, -აღნიშნა მურღულიამ.