“არც ერთი ფულის შოვნა არ ღირს იმად, რომ მერე ადამიანებმა, ქართული ფილმის არ იყოს, „კიკუ“ გეძახონ,”- ასე ეხმაურება ქართული რძის პროდუქტის გატანას რუსეთში “გირჩის” დეპუტატი იაგო ხვიჩია.

“არც ერთი ფულის შოვნა არ ღირს იმად, რომ ცოტა ხანში ადამიანებმა, ქართული ფილმის არ იყოს, „კიკუ“ გეძახონ,”- ასე ეხმაურება ქართული რძის პროდუქტის გატანას რუსეთში “გირჩის” დეპუტატი იაგო ხვიჩია.  მისი თქმით, საქართველოს დღეს მთელი მსოფლიო აკვირდება და თითოეული ნაბიჯის გადადგმა სწორედ უნდა იყოს გათვლილი.       “ქართველი ბიზნესმენი რომ ვიყო, რუსეთში პროდუქტების გატანას არ გავრისკავდი, რადგან ეს სულ წამოსაძახებელი და შესახსენებელი იქნება. მგონია, რომ არც ერთი ფულის შოვნა არ ღირს იმად, რომ ცოტა ხანში ადამიანებმა, ქართული ფილმის არ იყოს, „კიკუ“ გეძახონ. მგონი, რუსეთმა აკრძალვები თავად მოხსნა და ამ პროცესში საქართველოს ხელისუფლების როლი როგორია, არ ვიცით, მაგრამ ყველას გვეცოდინება იმ ბიზნესმენების როლი, ვინც ამ დროს ისარგებლებენ და რუსეთში პროდუქციას შეიტანენ. საქართველოს მთელი მსოფლიო უყურებს და ეს ყველაფერი პოლიტიკური აქტია, რომელიც სწორად უნდა ჩავიდინოთ, რათა შემდეგ ცუდად არ წამოგვაძახონ და სულ იქნება წამოსაძახებელი“, – განაცხადა იაგო ხვიჩიამ.

ცნობისათვის, დღეს გავრცელდა ინფორმაცია, რომ რუსეთის როსსელხოზნადზორი 15 ქართულ კომპანიას საშუალებას აძლევს, რუსეთში რძე და რძის პროდუქტები შეიტანოს.

გადაწყვეტილება 5 მარტს, როსსელხოზნადზორის ხელმძღვანელის, სერგეი დანკვერტისა და საქართველოს სოფლის მეურნეობის სამინისტროს სურსათის ეროვნული სააგენტოს ხელმძღვანელის, ზურაბ ჩეკურაშვილის შეხვედრის შემდეგ მიიღეს.

გავრცელებულ ინფორმაციასთან დაკავშირებით, სურსათის ეროვნულმა სააგენტომ განცხადება გაავრცელა და აღნიშნა, რომ 2020 წლიდან მოლაპარაკებები მიმდინარეობდა რუსეთის ფედერაციის მხარესთანაც, რომლის საფუძველზე, მიღებულ იქნა გადაწყვეტილება, ქართული ცხოველური წარმოშობის პროდუქციის ექსპორტის დაშვებასთან დაკავშირებით, რუსეთის ფედერაციასა და სხვა ქვეყნებში.

gtmedia.ge