არასრულწლოვანით ტრეფიკინგის ფაქტზე პროკურატურამ ერთ პირს ბრალდება წარუდგინა

საქართველოს გენერალურმა პროკურატურამ არასრულწლოვანით ვაჭრობის ფაქტზე ერთ პირს ბრალდება წარუდგინა.

როგორც უწყება წერს, ბრალდებულმა 12 წლის არასრულწლოვანი გადაიბირა და მას მუქარით და ფსიქოლოგიური ზეწოლით თბილისის ქუჩებში მოწყალების მოთხოვნასა და სხვადასხვა წვრილმანი ნივთების ქურდობას აიძულებდა.

“საქართველოს გენერალურმა პროკურატურამ არასრულწლოვანით ვაჭრობის (ტრეფიკინგის) ფაქტზე ერთ პირს ბრალდება წარუდგინა.

საქართველოს შინაგან საქმეთა სამინისტროში ჩატარებული გამოძიებით დადგინდა, რომ ბრალდებულმა სარგებლის მიღების მიზნით 12 წლის არასრულწლოვანი გადაიბირა და შრომით ექსპლუატაციას უწევდა მას. ბრალდებული მუქარით და ფსიქოლოგიური ზეწოლით დაზარალებულს აიძულებდა თბილისის ქუჩებში მოწყალების მოთხოვნას და სხვადასხვა წვრილმანი ნივთების ქურდობას. აღნიშნულის შედეგად შეგროვებულ თანხას კი თავისი შეხედულებისამებრ განკარგავდა.

მას ბრალდება საქართველოს სისხლის სამართლის კოდექსის 143 სეკუნდა მუხლის მესამე ნაწილის „ბ“ ქვეპუნქტით წარედგინა, რაც სასჯელის სახით 14-დან 17 წლამდე თავისუფლების აღკვეთას ითვალისწინებს.

პროკურატურის შუამდგომლობის საფუძველზე, თბილისის საქალაქო სასამართლომ ბრალდებულს აღკვეთის ღონისძიების სახით პატიმრობა შეუფარდა.

სისხლის სამართლის საქმეზე გამოძიება გრძელდება”, – ვკითხულობთ პროკურატურის განცხადებაში.